ნიკოლას ჯექსონი ბუნდესლიგაში? - მიუნხენის ბაიერნი ფორვარდის ტრანსფერთან ახლოსაა

გერმანიის მოქმედი ჩემპიონი აქტიურად ცდილობს ლონდონის „ჩელსის“ თავდამსხმელის, ნიკოლას ჯექსონის დამატებას. 24 წლის სენეგალელი ფეხბურთელი პირად საკითხებზე უკვე შეთანხმებულია მიუნხენელებთან და თანახმაა, რომ კარიერა „რეკორდმაისტერში“ იჯარით გააგრძელოს.

ტრანსფერის ბედი ახლა კლუბებს შორის საბოლოო მოლაპარაკებებზეა დამოკიდებული. აღსანიშნავია, რომ ჯექსონი „ჩელსიმ“ 2023 წლის ზაფხულში „ვილიარეალიდან“ 37 მილიონ ევროდ შეიძინა და მასთან კონტრაქტი 2033 წლის 30 ივნისამდე გააფორმა. Transfermarkt-ის შეფასებით, სენეგალელი შემტევის მიმდინარე სატრანსფერო ფასი 50 მილიონ ევროს შეადგენს.

უცხოური მედიის ცნობით, ჯექსონის მიმართ ინტერესს სხვა ტოპ-კლუბებიც იჩენენ — მათ შორის „ნიუკასლი“, „ტოტენჰემი“ და „მანჩესტერ იუნაიტედი“, თუმცა ამ ეტაპზე მის ხელში ჩაგდებასთან ყველაზე ახლოს სწორედ მიუნხენის „ბაიერნია“.