„ფეისბუკზე“ ატვირთული სიმღერის გამო თბილისის საქალაქო სასამართლოს მოსამართლე კობა ჩაგუნავამ მომღერალი სოფო ბათილაშვილი სამართალდამრღვევად ცნო და 3000 ლარით დააჯაირმა.
ცნობილი საპროტესტო სიმღერა „ოლა ოლა“-ს ინტერპრეტირებული ვერსია მომღერალმა 8 ოქტომბერს განათავსა სოციალურ ქსელში, სამართალდარღვევის ოქმი კი ამ პოსტზე 21 ოქტომბერს შეადგინა შსს- სიძულვილთან ბრძოლის დეპარტამენტის თანამშრომელმა თამარ რეზესიძემ.
„ოლე ოლა“ არის სიმღერა, რომელიც შეიცავს ხელისუფლებაში მყოფი „ქართული ოცნების“ გინებას [„ოლე, ოლა, „ქოცების“ დედის **ნა“], დემონსტრაციებზე და პროტესტის მხარდამჭერების მხრიდან 2024 წლის 28 ნოემბრის შემდეგ ის ხშირად ჟღერდება - ამ დღეს „ქართული ოცნების“ მთავრობის ხელმძღვანელმა, ირაკლი კობახიძემ თქვა, რომ 2028 წლამდე აღარ დააყენებდნენ ქვეყნის ევროინტეგრაციისთვის საჭირო მოლაპარაკებების გახსნის საკითხს, რამაც ხალხმრავალი პროტესტი გამოიწვია.
შინაგან სამეთა სამინისტრომ საქმის წარმოება ადმინისტრაციულ სამართალდარღვევის კოდექსის 166-ე, წვრილმანი ხულიგნობის მუხლით დაიწყო - ეს დარღვევა ითვალისწინებს ჯარიმას 500-დან 3 000 ლარამდე ან პატიმრობას 20 დღემდე ვადით.
- ბათილაშვილის დაცვის მხარე ამბობს, რომ სიმღერის გამო მომღერლის სამართალდამრღვევად განხილვა ეწინააღმდეგება კონსტიტუციას, რომელიც არა მხოლოდ გამოხატვის, არამედ შემოქმედებით თავისუფლებასაც იცავს;
- შსს-ს წარმომადგენელთა პოზიციით, სიმღერა „ოლა ოლა“, როგორც უწმაწური სიტყვების შემცველი ნაწარმოები, შეურაცხმყოფელია როგორც ფართო საზოგადოებისთვის, ისე კონკრეტულად „ქართული ოცნების“ მხარდამჭერებისთვის. შსს-მ სასამართლოს მოქალაქეთა მიმართვები წარუდგინა, სადაც მათი თქმით, ამ სიმღერის გამო მომხდარ უთანხმოებებზეა შეტყობინებები გაკეთებული.
ადვოკატის კითხვაზე, კონკრეტულად რა ქმედებაა მომღერლის მხრიდან სამართალდარღვევად მიჩნეული, სიმღერის ჩაწერა, ვიდეოს გადაღება თუ მისი განთავსება სოციალურ ქსელში, შსს-ს პოზიციაა „ვიდეოს ატვირთვა სოციალურ ქსელში“.
radiotavisupleba ახალი ამბები