ოპოზიციონერ ზვიად კუპრავას 2,5 წლით პატიმრობა მიესაჯა - დამხობის მოწოდების საქმეზე

მოსამართლე თამარ მჭედლიშვილმა დღეს 29 ივნისს, დამნაშავედ ცნო და 2 წლითა და 6 თვით პატიმრობა მიესაჯა, ოპოზიციონერ პოლიტიკოსს, "ნაციონალური მოძრაობის" წარმომადგენელს ზვიად კუპრავას, მას სახელმწიფო ხელისუფლების დამხობისკენ მოწოდებას ედავებოდნენ.

მას 5000-ლარიანი ჯარიმაც დაეკისრა წინააღმდეგობის გაწევისთვის.

პროკურატურის თანახმად, ზვიად კუპრავამ 2025 წლის 30 სექტემბერს სოციალურ ქსელში გამოაქვეყნა ვიდეოჩანაწერი, „რომლითაც საქვეყნოდ სახელმწიფო ხელისუფლების დამხობისკენ მოწოდება გააკეთა და 4 ოქტომბერს, არჩევნების დღეს განსახორციელებელ კონკრეტულ ძალადობრივ ქმედებებზე ისაუბრა. ასევე, ბრალდებულმა 1 ოქტომბერს მოსამართლის განჩინების საფუძველზე მისი დაკავებისას სახელმწიფო უსაფრთხოების სამსახურის თანამშრომლებს ძალადობით წინააღმდეგობა გაუწია“.

ზვიად კუპრავა სახელმწიფო უსაფრთხოების სამსახურმა გასული წლის 1 ოქტომბერს დააკავა ფეისბუკში წინა დღეს გამოქვეყნებული ვიდეომიმართვის გამო.

კუპრავას ბრალი ორი მუხლით ჰქონდა წარდგენილი

• 353-ე მუხლის პირველი ნაწილით (ხელისუფლების წარმომადგენლის მიმართ წინააღმდეგობის გაწევა);
• 317-ე მუხლით (ხელისუფლების დამხობისკენ მოწოდება).
• 2025 წლის 4 ოქტომბრის ადგილობრივ არჩევნებს ოპოზიციური პარტიებისა და მათი მხარდამჭერების დიდმა ნაწილმა ბოიკოტი გამოუცხადა და ხელისუფლების „მშვიდობიანი დამხობის“ მოწოდებით თბილისში, თავისუფლების მოედანზე შეიკრიბა.
• ხალხმრავალი საპროტესტო აქციიდან დემონსტრანტთა ერთი ჯგუფის მცდელობა, „გადაებარებინათ პრეზიდენტის სასახლის გასაღები“, ათონელის რეზიდენციის „ჯებირების“ გარღვევითა და სპეცრაზმთან დაპირისპირებით დასრულდა.