პოლიციამ „ბათუმელების“ ოპერატორი გურამ მურვანიძე დააკავა

12 იანვარს ღამით ბათუმში პოლიციამ ადგილობრივი ონლაინ გამოცემა „ბათუმელების“ ოპერატორი გურამ მურვანიძე და სხვა მოქალაქეები საპროტესტო აქციის დროს დააკავა. გურამ მურვანიძის მონათხრობი მის საქმიანობაში აშკარა ჩარევაზე მიუთითებს.

„გურამის მონათხრობი ხაზს უსვამს, რომ პოლიციის აგრესია გაძლიერდა მას შემდეგ, რაც მან თავი წარადგინა “ბათუმელების” თანამშრომლად“, – ნათქვამია გამოცემის განცხადებაში.

„ბათუმელები“ ​​აცხადებს, რომ გურამ მურვანიძე იმ დროს დააკავეს, როცა ის პოლიციელების მიერ მომიტინგეების დაკავებას იღებდა. როგორც თავად დაკავებული ოპერატორი იტყობინება, როდესაც ბათუმის პოლიციის უფროსმა ირაკლი დგებუაძემ იკითხა, ვინ იღებდა, გურამ მურვანიძემ თავი „ბათუმულების“ წარმომადგენლად წარადგინა, რასაც დგებუაძის მხრიდან სიტყვიერი შეურაცხყოფა და გამოცემის მიმართ გინება მოყვა, რის შემდეგაც მან „თანამშრომლებს გურამის ტელეფონის წართმევა უბრძანა“. დაკავების შემდეგ, მურვანიძის განცხადებით, მას სთხოვდნენ ტელეფონის პაროლს და სიტყვიერ შეურაცხყოფას აყენებდნენ და აგინებდნენ.

„აშკარაა, რომ პოლიციამ და ბათუმის პოლიციის უფროსმა კარგად იცოდნენ გურამ მურვანიძის ვინაობა, რომ ის „ბათუმელების” თანამშრომელი იყო. მიუხედავად ამისა, ბათუმის პოლიციის უფროსმა მოგვიანებით, „TV პირველთან” დაკავებულთა რაოდენობის შესახებ საუბრისას განაცხადა, რომ ოპერატორის ვინაობა არ იცოდა“, – ნათქვამია გამოცემის განცხადებაში.

მურვანიძის ადვოკატის მირზა მამულაძის განცხადებით, გამოძიება მიმდინარეობს ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (კანონიერი ბრძანებისადმი დაუმორჩილებლობა) მუხლებით. მისივე შეფასებით, „ეს ქმედებები წარმოადგენს მიზანმიმართულ მცდელობას, ხელი შეუშალონ მის ჟურნალისტურ საქმიანობას და მიზანმიმართულ თავდასხმას გამოცემა ბათუმელებზე”.

მურვანიძის დაკავებამდე ერთი დღით ადრე პოლიციამ ამავე გამოცემის დამფუძნებელი და დირექტორი მზია ამაღლობელი დააკავა, რომელსაც 13 იანვარს პოლიციელზე თავდასხმის ბრალი წარუდგინეს, რაც ოთხიდან შვიდ წლამდე თავისუფლების აღკვეთას ითვალისწინებს. დაკავების შემდეგ მან პოლიციის მხრიდან არასათანადო მოპყრობის შესახებ განაცხადა.

„ბათუმელები“ ​​მოუწოდებს ყველა შესაბამის დაინტერესებულ მხარეს, „რეაგირება მოახდინონ ჟურნალისტური თავისუფლების ამ მიუღებელ დარღვევებზე, ხოლო სპეციალურ საგამოძიებო სამსახურს – უზრუნველყონ პასუხისმგებელ პირთა ანგარიშვალდებულება“.

This post is also available in: English (ინგლისური)