პრაღაში ათასობით ადამიანი გავიდა ქუჩაში საპროტესტოო დემონსტრაციაზე

აქციების მონაწილეებს ეშინიათ, რომ ფიზიკური პირების მიერ გადახდილი სააბონენტო გადასახადიდან სახელმწიფო ბიუჯეტიდან პირდაპირ დაფინანსებაზე გადასვლის გეგმა მთავრობას საშუალებას მისცემს შეზღუდოს მედიის თავისუფლება.

მილიარდერი პრემიერმინისტრის, ანდრეი ბაბიშის ხელმძღვანელობით მოქმედი კოალიციური მთავრობა კი ამტკიცებს, რომ მაუწყებლებს ხარჯების შემცირება სჭირდებათ და დაჟინებით აცხადებს, რომ გეგმას არანაირი გავლენა არ ექნება სარედაქციო დამოუკიდებლობაზე ან პროგრამულ შინაარსზე.

როგორც ჩეხეთის ტელევიზიამ, ისე ჩეხეთის რადიომ სამშაბათს შეამცირეს თავიანთი პროგრამები, რადგან ათასობით თანამშრომელი შეუერთდა პროტესტს.

პერსონალი მედიის სათავო ოფისიდან პრაღის ცენტრალური, ვაცლავის მოედნისკენ გაემართა, სადაც მათ უნივერსიტეტის სტუდენტები და სხვა მომიტინგეები შეუერთდნენ.

ბევრს ეკეთა ქაღალდის სამკუთხა ქუდი, ჩეხური ტელევიზიის პოპულარული ანიმაციური პერსონაჟის მსგავსი, რომელიც პროტესტის სიმბოლოდ იქცა.

ჩეხეთის პარლამენტმა, სადაც ბაბიშის სამპარტიული ნაციონალისტური კოალიცია დომინირებს, კანონპროექტი გასულ თვეს გამართულ სკანდალურ ღამის სესიაზე სამი მოსმენიდან პირველი მოსმენით დაჩქარებული წესით მიიღო.

ბაბიშმა ამ კვირაში განაცხადა, რომ მეორე მოსმენა შესაძლოა იანვარში შედგეს.

კრიტიკოსებმა ბაბიში დაადანაშაულეს საზოგადოებრივი მედიის იმგვარად ჩახშობის მცდელობაში, როგორიც მისმა მოკავშირეებმა განახორციელეს სხვა ქვეყნებში, განსაკუთრებით სლოვაკეთის პრემიერმინისტრმა რობერტ ფიცომ და უნგრეთის ყოფილმა ლიდერმა ვიქტორ ორბანმა.

ბაბიშის მთავრობას სურს შეამციროს ორივე მაუწყებლის ბიუჯეტი, რაც ფაქტობრივად გააუქმებს გასულ წელს წინა ცენტრისტულ-მემარჯვენე მთავრობის მიერ დამტკიცებულ დაფინანსების გაზრდას.

ბაბიშმა ორშაბათს განაცხადა, რომ „არავის სურს საზოგადოებრივი მედიის გაკონტროლება, მით უმეტეს მათი ნაციონალიზაცია“ და რომ „არაფერი იმისგან, რასაც ხალხი აპროტესტებს... სიმართლეს არ შეესაბამება“.

გეგმამ საერთაშორისო კრიტიკა გამოიწვია ევროპის მაუწყებელთა კავშირის (EBU), ჟურნალისტთა ევროპული ფედერაციის, „ჟურნალისტები საზღვრებს გარეშე“ (RSF) და პრესის საერთაშორისო ინსტიტუტის (IPI) მხრიდან.

ათასობით ადამიანი უკვე შეიკრიბა პრაღაში 25 ოქტომბერს, ხოლო უფრო მასშტაბური დემონსტრაცია ჩეხეთის დედაქალაქში 15 ნოემბერს არის დაგეგმილი.