radiotavisupleba ახალი ამბები 
რუსეთის საპარლამენტო არჩევნების წინასწარი ოფიციალური შედეგებით, პუტინის მხარდამჭერ პარტია „ედინაია როსიას“(ერთიანი რუსეთი) სახელმწიფო დუმაში საკონსტიტუციო უმრავლესობა ექნება.
რუსეთის ცენტრალური საარჩევნო კომისიის თანახმად, ბიულეტენების 90%-ზე მეტის მონაცემთა შეჯამებით, „ედინაია როსიას“ 57,86% აქვს.
რუსეთის 450-წევრიან სახელმწიფო დუმას პროპორციულ-მაჟორიტარული სისტემით ირჩევენ. წინასწარი ოფიციალური შედეგებით, „ედინაია როსიას“ კანდიდატები ლიდერობენ 225-დან 200-ზე მეტ ერთმანდატიან ოლქში. საერთო ჯამში, ორივე სისტემით, პარტიას დუმაში 300-ზე მეტი წევრი ეყოლება.
არჩევნები 18-20 სექტემბერს ჩატარდა.
დუმის არჩევნების წინასწარი ოფიციალური შედეგებით, მეორე ადგილზე კომუნისტური პარტიაა ხმების 13%-ზე მეტით. მას მოსდევენ ლიბერალ-დემოკრატიული პარტია(8,9%) და „ახალი ხალხი“(7,94%).
ამ სამ პარტიასა და „ედინაია როსიასთან“(საკონსტიტუციო უმრავლესობა) ერთად რუსეთის წინა მოწვევის დუმაში წარმოდგენილი იყო პარტია „სპრავედლივაია როსიაც“ (სამართლიანი რუსეთი), რომელიც ამჯერად, სავარაუდოდ, პარლამენტს მიღმა დარჩება. წინასწარი ოფიციალური მონაცემებით, პარტიის შედეგი 5%-იან საარჩევნო ბარიერს ქვემოთაა (4,95%).
რუსეთის სახელმწიფო დუმის არჩევნებში, რომელიც 18-20 სექტემბერს ჩატარდა, კიდევ ხუთი პარტია მონაწილეობდა. მათ 5%-იანი ბარიერი ვერ გადალახეს.
რუსეთში საპარლამენტო არჩევნები ჩატარდა უკრაინის წინააღმდეგ ომის, რუსეთის ხელისუფლების მიერ პოლიტიკურ სისტემაზე კონტროლისა და რეპრესიების გაძლიერების, ოპონენტების კიდევ უფრო შეზღუდვისა და ქვეყანაში რეალური პოლიტიკური კონკურენციის არარსებობის პირობებში.
უკრაინაში ომის მოწინააღმდეგე ერთადერთ პარტიას, „იაბლოკოს" 2026 წლის აგვისტოში გაუუქმეს საარჩევნო სიის რეგისტრაცია და არჩევნებზე არც მაჟორიტარი კანდიდატების უმეტესობა დაუშვეს.
სახელმწიფო დუმის არჩევნების მიმდინარეობისას „იაბლოკო“ და კომუნისტური პარტია აცხადებდნენ, რომ მათ ასეულობით დამკვირვებელს ხელს უშლიდნენ მოვალეობის შესრულებაში, უბნებიდან მათ გაძევებას ცდილობდნენ და ხმების დათვლის პროცესზე წვდომას უზღუდავდნენ. დამკვირვებლებისგან იყო შეტყობინებები ე.წ. კარუსელებისა და სხვა დარღვევების შესახებ.
რუსეთის ხელისუფლებამ დამოუკიდებელი ქვეყნების ტერიტორიული მთლიანობისა და სუვერენიტეტის და საერთაშორისო სამართლის დარღვევით სახელმწიფო დუმის არჩევნები ჩაატარა საქართველოსა და უკრაინაში ოკუპირებულ ტერიტორიებზეც.
საქართველოს ტერიტორიაზე, ოკუპირებულ აფხაზეთსა და ცხინვალის რეგიონში ადგილობრივ მცხოვრებთა დიდ ნაწილს რუსეთის მოქალაქეობაც აქვს.
