„რაც ვნახე, სიმხეცეა“ — იოსელიანის თქმით, მომიტინგეებს დაზიანებები აღენიშნებათ

სახალხო დამცველმა დიღომში მდებარე დროებითი მოთავსების იზოლატორში დაკავებული აქციის მონაწილეები მოინახულა.

ლევან იოსელიანის განცხადებით, დიღმის იზოლატორში მყოფი 15-მდე დაკავებულიდან ყველა, ორის გარდა, აცხადებს, რომ დაკავებისას საშინელ ფიზიკურ ზეწოლას დაექვემდებარა.

„ხილული დაზიანებები ძირითადად სახის არეში აქვთ მიღებული, თუმცა, ზოგიერთის თქმით, სხეულის სხვა ადგილებიც აქვთ დაშავებული. ერთ-ერთ დაკავებულს მთელი სახე სისხლნაჟღენთებით ჰქონდა სავსე. რაც ვნახე, არის სიმხეცე, რომელსაც გამართლება არ აქვს. პოლიციას კიდევ ერთხელ მოვუწოდებ, დაკავებისას არ გადაამეტოს თავის უფლებამოსილებას. კანონი უპირველესად კანონდამცველმა უნდა დაიცვას და დამნაშავესაც კანონის მიხედვით უნდა მოეპყროს. ყველას პასუხისმგებლობა უნდა დადგეს. ყველასი, ვინც აკავებს, ვინც საპოლიციო ოპერაციას ატარებს, და მერე ვინც იძიებს დაკავების პირობებს“, — განაცხადა იოსელიანმა ჟურნალისტებთან.

ომბუდსმენმა მიმართა სპეციალურ საგამოძიებო სამსახურს, ეფექტიანად გამოიძიოს თითოეული შემთხვევა.

„ასეთი საქმეების გამოძიების დაყოვნებამ მოიტანა ის, რომ აქციებზე წლიდან წლამდე უფრო და უფრო მეტი ადამიანი ხდება ძალადობის მსხვერპლი. ნებისმიერი შემთხვევა, რომელიც გამოუძიებელი რჩება და რომელზეც სახელმწიფო დროულად და ადეკვატურად არ რეაგირებს, მათი გამეორების ალბათობას ზრდის. ამიტომ, ეს პროცესი უნდა შეჩერდეს. ჩვენ ყველა ინფორმაციას გავასაჯაროებთ და ყველა ჩვენს ხელთ არსებულ მასალას გავუგზავნით სპეციალურ საგამოძიებო სამსახურს. ასევე, მივადევნებთ თვალს თავად გამოძიების მიმდინარეობას“, — განაცხადა ლევან იოსელიანმა.

შინაგან საქმეთა სამინისტროს ინფორმაციით, 29-30 ნოემბრის ღამით 107 ადამიანი დააკევეს.

• მასობრივი პროევროპული და ანტისამთავრობო დემონსტრაციები თბილისსა და საქართველოს სხვა ქალაქებში 28 ნოემბერს დაიწყო. ამ დღეს ოფიციალურად გახდა ცნობილი რომ “ოცნება” უარს ამბობს ევროკავშირში ინტეგრაციაზე.
• 28 ნოემბერს ირაკლი კობახიძემ განაცხადა: „დღეს მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკებების გახსნის საკითხი. ასევე, 2028 წლის ბოლომდე უარს ვამბობთ ყოველგვარ საბიუჯეტო გრანტზე ევროკავშირის მხრიდან“.
• კობახიძის ამ განცხადებას მოყვა სპონტანური აქცია “ქართული ოცნების” ოფისთან, რაც შემდგომ გადაიზარდა მრავალათასიან დემონსტრაციაში.
• სპეცრაზმმა 28 ნოემბერს დაარბია და დაშალა პარლამენტის შენობასთან მიმდინარე აქცია, 29 ნოემბრის გამთენიისას კი რუსთაველის გამზირზე დარჩენილ მომიტინგეთა მცირე რაოდენობას სასტიკად გაუსწორდა.
• ამის მიუხედავად 29 ნოემბერს მოქალაქეები კვლავ შეიკრიბნენ პარლამენტთან, ისევე როგორც სხვა ქალაქებში.
• სპეცრაზმმა იძალადა არაერთ ჟურნალისტსა და მოქალაქეზე.