radiotavisupleba ახალი ამბები 
რუსეთმა განაახლა თავდასხმები უკრაინის ექსპორტისთვის კრიტიკულად მნიშვნელოვან ზეთოვანი კულტურების გადამამუშავებელ ქარხნებზე და ხუთშაბათს დაარტყა დნეპროპეტროვსკში მდებარე მსხვილ ობიექტს, რომელიც გლობალური აგრობიზნესისა და კვების კომპანია „Bunge“-ს ეკუთვნის.
Reuters-ის თანახმად, რუსეთთან ომამდე უკრაინა მზესუმზირას ზეთის უმსხვილესი ექსპორტიორი იყო მსოფლიოში და ამ პროდუქტის 5-დან 6 მილიონ ტონამდე ექსპორტს ახორციელებდა წელიწადში.
მთავრობის მონაცემებით, მცენარეული ზეთის ექსპორტიდან მიღებულმა შემოსავალმა 2025 წელს 5,2 მილიარდი დოლარი შეადგინა, 2021 წლის 7 მილიარდ დოლართან შედარებით.
ეს ქარხანა ერთ-ერთია უკრაინის ხუთ უდიდეს ქარხანას შორის და მას დღეში 1 600 ტონა ზეთოვანი კულტურის გადამუშავება შეუძლია.
რეგიონის გუბერნატორმა ოლექსანდრ ჰანჟამ უფრო ადრე განაცხადა, რომ ორგანიზებულ თავდასხმებს, რომლებმაც ქალაქში მდებარე კვების საწარმო დააზიანა, ორი ადამიანი ემსხვერპლა, ხოლო ხუთი დაშავდა.
ბოლო წელიწად-ნახევრის განმავლობაში რუსეთი ოთხჯერ დაესხა თავს უკრაინის ზეთოვანი კულტურების გადამამუშავებელ ქარხნებსა და მცენარეული ზეთის ტერმინალებს, მათ შორის 2026 წლის იანვარში განხორციელდა დარტყმა დნიპროში მდებარე „Bunge“-ს ობიექტზე.
„Bunge“-ს აღნიშნულ თავდასხმაზე კომენტარი ჯერ არ გაუკეთებია.
ანალიტიკური სააგენტო APK-Inform-ის განცხადებით, მზესუმზირას მოსავლის მკვეთრი ზრდის წყალობით, მოსალოდნელია, რომ უკრაინა 2026/27 წლების სეზონზე მზესუმზირას ზეთის წარმოებას 5.8 მილიონ ტონამდე გაზრდის, 2025/26 წლების 4.4 მილიონი ტონიდან.
Reuters-ი იტყობინება, რომ რუსეთის თავდაცვის სამინისტროს ხუთშაბათის განცხადებით, რუსულმა ძალებმა დარტყმა მიაყენეს სატვირთო გემს, რომელიც, მათი აღწერით, უკრაინის ჩორნომორსკის პორტში სამხედრო ტვირთის გადასაზიდად გამოიყენებოდა.
სააგენტომ ვერ შეძლო ამ განცხადების დამოუკიდებლად გადამოწმება.
