15 ნოემბერს, ღამით, რუსეთის არმიამ იერიში მიიტანა ოდესის ოლქის ქალაქ ჩერნომორსკზე - ამის შესახებ უკრაინის საგანგებო სიტუაციების სახელმწიფო სამსახური იტყობინება.
ოფიციალური ინფორმაციით, დარტყმის შედეგად ექვსი ადამიანი დაშავდა.
„დაზიანებულია ენერგეტიკული ინფრასტრუქტურა, მნიშვნელოვნად დაზიანდა ოთხსართულიანი ადმინისტრაციული შენობა. ცეცხლი გაუჩნდა ორ ავტომობილს. აფეთქების ტალღამ და ნამსხვრევებმა დააზიანეს გაზის მილი; დაზიანებულია მეზობელი საცხოვრებელი სახლების ფასადები და ფანჯრები“, – ვკითხულობთ განცხადებაში.
საგანგებო სიტუაციების სამსახური ასევე იტყობინება, რომ ერთ-ერთ ბინაში ჩაიკეტა დაშავებული მამაკაცი, რომლის გადასარჩენადაც მაშველების ჩართვა გახდა საჭირო.
ხშირია ცნობები, რომ რუსეთის არმია, სხვადასხვა სახის შეიარაღებით - დრონებით, რაკეტებითა თუ მართვადი საავიაციო ბომბებით - თავს ესხმის უკრაინის ქალაქებსა და სამოქალაქო ინფრასტრუქტურას, ქვეყნის ყველა რეგიონში. შედეგად, იღუპებიან მშვიდობიანი ადამიანები.
უკრაინის ხელისუფლება და საერთაშორისო პარტნიორები ამ ტიპის დარტყმებს ომის დანაშაულებად აფასებენ და მათ მიზანმიმართულ ხასიათს უსვამენ ხაზს.
რუსეთის ხელმძღვანელობა ასეთ ბრალდებებს უარყოფს.
radiotavisupleba ახალი ამბები