რუსეთში არარსებული ორგანიზაციის “ექსტრემისტულად” აღიარებას ითხოვენ

რუსეთის იუსტიციის სამინისტრომ სარჩელი შეიტანა ქვეყნის უზენაეს სასამართლოში და მოითხოვა, რომ “ანტირუსული სეპარატისტული მოძრაობა და მისი ქვედანაყოფები” გამოცხადდეს “ექსტრემისტულ ორგანიზაციად“ და რუსეთის ტერიტორიაზე აიკრძალოს.

ვინ ან რას წარმოადგენს “ანტირუსული სეპარატისტული მოძრაობა” გაურკვეველია. როგორც ჩანს, ის არასოდეს ყოფილა ნახსენები მედიის ანგარიშებში. ადამიანის უფლებათა და იურიდიული დახმარების ჯგუფმა “OVD-Info-მ” განაცხადა, რომ ვერ იპოვა რაიმე ჩანაწერი მსგავსი ორგანიზაციის შესახებ.

იუსტიციის სამინისტროს მიერ სარჩელის შესახებ განცხადებაში ნათქვამია, რომ აღნიშნული სუბიექტი არის “საერთაშორისო მოძრაობა, რომელიც მიმართულია რუსეთის მრავალეროვნული ერთიანობისა და ტერიტორიული მთლიანობის განადგურებისკენ”.

უზენაესი სასამართლო სარჩელს 7 ივნისს განიხილავს.

“მედუზას” ინფორმაციით, ეს არ არის პირველი შემთხვევა, როდესაც რუსეთის ხელისუფლება ითხოვს მოძრაობის აკრძალვას ოფიციალური სტრუქტურისა და წევრების გარეშე. 2023 წლის ნოემბერში რუსეთის უზენაესმა სასამართლომ “საერთაშორისო LGBT მოძრაობა” კანონგარეშედ გამოაცხადა, როგორც “ექსტრემისტული ორგანიზაცია”, მიუხედავად იმისა, რომ რუსეთში ასეთი ჯგუფი არ იყო რეგისტრირებული.