„რუსულმა სამყარომ“ საქართველოს მიწაზე მოიტანა სიკვდილი, ნგრევა, უკანონობა და სიღარიბე - უკრაინის საგარეო საქმეთა სამინისტრო

„ჩვენ არასოდეს ვაღიარებთ ქართული მიწების ოკუპაციას და ამ პოლიტიკის ერთგულნი დავრჩებით მანამ, სანამ რუსი ოკუპანტი საქართველოს არ დატოვებს“, - წერია განცხადებაში.

რუსეთთან ომში მყოფი უკრაინის საგარეო საქმეთა სამინისტრო ყურადღებას ამახვილებს ომის შედეგებზე:

„რუსულმა სამყარომ“ საქართველოს მიწაზე მოიტანა სიკვდილი, ნგრევა, უკანონობა და სიღარიბე - ისევე, როგორც ყველგან მსოფლიოში, სადაც კი მან ფეხი მოიკიდა. საქართველოს რეგიონები, რომლებსაც წარმატებული განვითარების პერსპექტივა ჰქონდათ, რუსმა აგრესორმა და მისმა მარიონეტულმა ძალებმა გადააქციეს დეპრესიულ ზონად, სადაც ადამიანის უფლებები უხეშად ირღვევა“.

რუსეთ-საქართველოს ომის დაწყებიდან 18 წელი გავიდა.

ხუთდღიანმა ომმა საქართველოს 400-ზე მეტი მოქალაქის - სამხედრო და სამოქალაქო პირების - სიცოცხლე იმსხვერპლა და 30 000-მდე დევნილად აქცია.

რუსეთის მიერ ოკუპირებულია საქართველოს ტერიტორიის 20%.

ოფიციალური მონაცემებით, 2008 წლის აგვისტოს ომის შედეგად დაიღუპა საქართველოს შეიარაღებული ძალების 169 სამხედრო მოსამსახურე, შინაგან საქმეთა სამინისტროს 19 თანამშრომელი და 220-ზე მეტი სამოქალაქო პირი.

აგვისტოს ომის შემდეგ რუსეთმა ე.წ. დამოუკიდებელ რესპუბლიკებად აღიარა საქართველოს ორი ტერიტორია, ცხინვალის რეგიონი და აფხაზეთი.