სააკაშვილი: სოლიდარობა ხაზარაძეს, ჯაფარიძეს, ოქრუაშვილს, გახარიას

მათ შორის სააკაშვილი ასახელებს მამუკა ხაზარაძეს, ბადრი ჯაფარიძეს, ირაკლი ოქრუაშვილსა და გიორგი გახარიას.

„ახლა ვიღაცები მახსენებენ, რომ მამუკა ხაზარაძეს არ მოსწონდა, რომ მე როგორც პატიმარს ვიდეო ჩართვების საშუალებას მაძლევდნენ. ჩემი პასუხი ამაზე მარტივია - ამას ახლა არანაირი მნიშვნელობა არ აქვს. მამუკამ და ბადრიმ გამოიჩინეს პრინციპულობა, როცა უარი თქვეს არალეგიტიმურ ორგანოსთან თანამშრომლობაზე და ისინი იმსახურებენ ჩვენს თანადგომას და დაუყოვნებლივ უნდა გათავისუფლდნენ“, - წერს სააკაშვილი ფეისბუკზე.

2024 წლის 6 ნოემბერს, მას შემდეგ, რაც არჩევნების შესაძლო გაყალბების საქმეზე გამოძიების ფარგლებში მოსამართლის წინაშე დაიკითხა, განაცხადა: „ორი სტანდარტია... მე ვთქვი, როცა მიხეილ სააკაშვილი გამოდის და საათ-ნახევარი აქვს საშუალება, ისაუბროს ყველა თემაზე, მეორე ოთახში თურმე მე არ მაქვს უფლება, ვისაუბრო ისეთ თემებზე, რომლებიც ქვეყანას აწუხებს არჩევნებთან მიმართებით“.

სააკაშვილი ირაკლი ოქრუაშვილსაც უცხადებს სოლიდარობას: „აღარც იმას აქვს მნიშვნელობა, რომ ჩემი "განაჩენები" ეფუძნება ირაკლი ოქრუაშვილის ცრუ ჩვენებებს. ის ციხეში ამის გამო კი არ ზის არამედ სწორი საქციელისთვის და მის მიმართ სოლიდარობა აუცილებელია“.

გახარიასთან დაკავშირებით სააკაშვილი წერს: „ბ.-ნი გახარია დაუშვებლად მიიჩნევს ჩემს გათავისუფლებას, ვინაიდან „ეს გამოიწვევდა დესტაბილიზაციას“. არა მგონია, თვითონ ახლა ძალიან სტაბილურად გრძნობდეს თავს და პირადად მე მსურს მის მიმართ სოლიდარობა გამოვხატო. მისგან განსხვავებით, მე მივიჩნევ, რომ ყველა ვისაც ივანიშვილი იჭერს არის პოლიტპატიმარი და უნდა გათავისუფლდეს“.

„ისე, ისიც ფაქტია, რომ იმან რომ თავის დროზე ივანიშვილს ჩემი დაჭერა გაუვიდა, გაუხსნა მას ხელი დღევანდელი მასობრივი რეპრესიებისთვის“, - წერს ის ფეისბუკზე.

მას შემდეგ, რაც შარშან გახარიას პარტიელებმა კიდევ ერთხელ მოუწოდეს ხელისუფლებას, სააკაშვილი კლინიკიდან ციხეში დაებრუნებინათ, გახარიამ განაცხადა:

„მისთვისვე ჯობია ,ამ პოლიტიკური თემიდან გაიყვანონ. იმიტომ, რომ ამ პოლიტიკური თემებიდან თუ გაიყვანეს, ჩნდება შესაძლებლობა, ჰუმანიტარულ განზომილებაში მისი პრობლემა გადაწყდეს. თქვენ გგონიათ, მე მიხარია, რომ ქვეყნის პრეზიდენტი ციხეშია და ამ სამარცხვინო კადრებს რომ ანახებს „ოცნება“ მთელ მსოფლიოს, თქვენ გგონიათ, ეს მე მომწონს? არ მომწონს“, - თქვა მან 28 მარტს.

27 ივნისის მდგომარეობით, საქართველოს ჰყავს რვა პოლიტიკოსი, რომლებსაც „ქართული ოცნების“ საგამოძიებო კომისიაში გამოუცხადებლობის გამო პატიმრობა მიესაჯათ ან წინასწარ პატიმრობაში არიან და დღე-დღეზე ელიან განაჩენის გამოცხადებას.

• ნიკა მელია - მას დღეს 8-თვიანი პატიმრობა მიუსაჯეს.
• გიორგი ვაშაძე - მას შვიდი თვით პატიმრობა მიუსაჯეს; იგი 24 ივნისს დააპატიმრეს.
• მამუკა ხაზარაძე და ბადრი ჯაფარიძე - მიუსაჯეს რვა-რვა თვით პატიმრობა; ისინი 23 ივნისს დააპატიმრეს.
• ზურაბ გირჩი ჯაფარიძე - მიუსაჯეს შვიდი თვით პატიმრობა. ის 22 მაისს დააკავეს მას შემდეგ, რაც გირაოს თანხა არ გადაიხადა.
• ყველა მათგანს ორი წლით აუკრძალეს თანამდებობის დაკავება.

ამავე მუხლით დაკავებულნი არიან ნიკა გვარამია და ირაკლი ოქრუაშვილი. მათი განაჩენი სასამართლოს ჯერ არ გამოუცხადებია.

გიორგი გახარია იმ გამონაკლის ოპოზიციონერებს შორისაა, რომლებიც კომისიის სხდომაზე მივიდნენ. თუმცა 16 ივნისს ცნობილი გახდა, რომ ის კიდევ ერთხელ დაიბარეს კომისიაზე. გიორგი გახარია სხდომაზე 23 ივნისს უნდა გამოცხადებულიყო, თუმცა ქვეყანაში არ იმყოფება. მისი პარტიის ცნობით, ის თანახმა იყო დისტანციურად ჩართვაზე, თუმცა კომისიამ ეს თხოვნა არ დააკმაყოფილა.

მეორედ არიან დაბარებული ნიკა გვარამია და მამუკა ხაზარაძე - დისტანციურად, საპატიმროდან ჩართვით. სავარაუდოდ, ისინი არც ამჯერად არ გამოცხადდებიან.

დროებითი საგამოძიებო კომისიის თავმჯდომარე თეა წულუკიანის თანახმად, შესაძლოა, ხაზარაძისა და გვარამიას წინააღმდეგ კვლავ მიმართონ პროკურატურას.

„ქართული ოცნების“ ხელისუფლებაში ყოფნის პირობებში გამოტანილი სასამართლო განაჩენების თანახმად, მიხეილ სააკაშვილს 2034 წლის 1 აპრილამდე მოუწევს პატიმრობაში ყოფნა.