საოკუპაციო ხაზთან 8 თვის წინ დაკავებული საქართველოს მოქალაქე გაათავისუფლეს

ოკუპირებული ცხინვალის რეგიონის ე.წ. სახელმწიფო უშიშროების კომიტეტის („კაგებე“) ცნობით, საუბარია ხაშურის მუნიციპალიტეტის სოფელ კლდისწყაროს მცხოვრებზე, 46 წლის გიორგი ხარაიშვილზე.

მას ე.წ. საზღვრის განზრახ უკანონო გადაკვეთა დააბრალეს და პატიმრობა მიუსაჯეს. ის „დაკისრებული სასჯელის ვადის ამოწურვასთან დაკავშირებით“ გაათავისუფლეს.

ხარაიშვილმა უკანონო პატიმრობაში 8 თვეზე მეტი - 252 დღე გაატარა.

სუს-ის ცნობით, საქართველოს მოქალაქის უკანონო პატიმრობიდან უპირობო გათავისუფლების საკითხს საქართველოს ცენტრალური ხელისუფლება რეგულარულად აყენებდა ინციდენტების პრევენციისა და მათზე რეაგირების მექანიზმის (IPRM) და ჟენევის საერთაშორისო დისკუსიების ფორმატში. გამოიყენებოდა „ცხელი ხაზის“ მექანიზმი, პროცესში იყვნენ ჩართული საერთაშორისო პარტნიორები.

„ცენტრალური ხელისუფლება, საერთაშორისო პარტნიორებთან ერთად, განაგრძობს აქტიურ მუშაობას ოკუპირებულ ტერიტორიებზე უკანონო პატიმრობაში მყოფი საქართველოს ყველა მოქალაქის გასათავისუფლებლად“, - აღნიშნულია სუს-ის განცხადებაში.

• რუსეთის საოკუპაციო ძალები საქართველოს მოქალაქეებს ხშირად აკავებენ უკანონოდ, - ზოგჯერ საოკუპაციო ხაზთან, ზოგჯერ ოკუპირებულ ტერიტორიებზე, - განგრძობადი „ბორდერიზაციის“ პირობებში.