netgazeti 
Freedom House-ის უახლესი ანგარიშის, „ინტერნეტის თავისუფლება 2026“ (Freedom on the Net 2026) თანახმად, გლობალურ ციფრულ სივრცეში მნიშვნელოვანი ცვლილებები ფიქსირდება.
ამ ცვლილებების ფონზე, საქართველოს სტატუსი გაუარესდა და ქვეყანამ „თავისუფალი“ კატეგორიიდან „ნაწილობრივ თავისუფალ“ კატეგორიაში გადაინაცვლა.
ორგანიზაციის შეფასებით, საქართველოს რეიტინგის ვარდნა კონკრეტულ პოლიტიკურ მოვლენებს უკავშირდება. ანგარიშში ხაზგასმულია, რომ ხელისუფლებამ განაგრძო ონლაინ აქტივიზმისა და იმ სიტყვისა თუ გამოხატვის ჩახშობა, რომელიც მმართველი პარტიის, „ქართული ოცნების“, მიმართ კრიტიკულად აღიქმება.
გლობალური და რეგიონული რეიტინგების მიხედვით, საქართველომ 100 შესაძლოდან 68 ქულა მიიღო და „ნაწილობრივ თავისუფალი“ ქვეყნების რიგებში დამკვიდრდა.
საქართველოში ინტერნეტის თავისუფლების კუთხით არსებული გამოწვევები ნაწილია იმ ფართო სურათისა, რომელსაც Freedom House აღწერს. ანგარიშის მთავარი მიგნებების მიხედვით, გლობალური ინტერნეტის თავისუფლება ზედიზედ მე-16 წელია მცირდება. ანგარიშის თანახმად, სხვადასხვა ქვეყნის მთავრობები სულ უფრო მეტ ახალ ბარიერს აწესებენ იმისათვის, რომ შეზღუდონ ინფორმაციის ხელმისაწვდომობა და ადამიანების თავისუფალი თვითგამოხატვა ონლაინ სივრცეში.
საქართველო „Freedom on the Net“-ის ანგარიშში მისი პირველივე, 2009 წლის საპილოტე გამოცემიდან მონაწილეობს.
საქართველომ „თავისუფალი“ ქვეყნის სტატუსი პირველად 2012 წელს მოიპოვა (მანამდე ის „ნაწილობრივ თავისუფალი“ იყო) და ეს პოზიცია ათ წელზე მეტი ხნის განმავლობაში შეინარჩუნა.
