netgazeti 
29 ოქტომბერს აზერბაიჯანის პრემიერ-მინისტრი ალი ასადოვი საქართველოში სამუშაო ვიზიტით ჩამოვიდა. ვიზიტი ორ დღეს, 29 და 30 ოქტომბერს გაგრძელდება.
აზერბაიჯანული სააგენტო APA-ს ცნობით, თბილისის საერთაშორისო აეროპორტში ასადოვს საქართველოს ვიცე-პრემიერი, ეკონომიკისა და მდგრადი განვითარების მინისტრი მარიამ ქვრივიშვილი და სხვა ოფიციალური პირები დახვდნენ.
საქართველოს მთავრობის ადმინისტრაციის ინფორმაციით, ვიზიტის ფარგლებში გაიმართება საქართველო-აზერბაიჯანის ეკონომიკური თანამშრომლობის მთავრობათაშორისი კომისიის მე-11 სხდომა. ასევე დაგეგმილია ალი ასადოვისა და საქართველოს პრემიერ-მინისტრის, ირაკლი კობახიძის პირისპირ შეხვედრა.
აზერბაიჯანის პრემიერ-მინისტრს საქართველოში თან ახლავს ეკონომიკის, ენერგეტიკის, ციფრული განვითარებისა და ტრანსპორტის, ასევე მეცნიერებისა და განათლების მინისტრები.
