1 week ago
2
ჩინეთის ლიდერი სი ძინ პინი არ დაესწრება აშშ-ის არჩეული პრეზიდენტის, დონალდ ტრამპის ინაუგურაციის ცერემონიას, რომელიც ვაშინგტონში 20 იანვარს გაიმართება. ამის შესახებ CBS News-ი წყაროებზე დაყრდნობით იუწყება.
მოსალოდნელია, რომ ცერემონიას დაესწრება ჩინეთის ელჩი აშშ-ში, რაც სტანდარტული პროცედურაა. ამერიკული ტელეარხის თანახმად, ინაუგურაციას დაესწრებიან ასევე ჩინეთის სხვა ოფიციალური პირები, მაგრამ არა სი ძინ პინი.
CBS News-ის ცნობით, არაოფიციალური არხებით გადაცემულმა მიწვევამ "პეკინი გააკვირვა", რადგან ჩინელი ჩინოვნიკები "მიჩვეული არიან მკაცრ პროტოკოლს" აშშ-ჩინეთის ურთიერთობებში.
ვაშინგტონში ჩინეთის საელჩომ კომენტარის გაკეთება არ ისურვა. ტრამპის გუნდმა არ უპასუხა ჟურნალისტების თხოვნას კომენტარზე.
წუხელ ტელეკომპანია CBS-მა გაავრცელა ცნობა, რომ აშშ-ის არჩეულმა პრეზიდენტმა დონალდ ტრამპმა თავის ინაუგურაციაზე ჩინეთის ლიდერი სი ძინ პინი დაპატიჟა. ინფორმირებული წყაროების თანახმად, მოსაწვევი ჩინეთის ლიდერს ნოემბრის დასაწყისში, აშშ-ის საპრეზიდენტო არჩევნების დასრულებიდან მალევე გაეგზავნა.
CBS-ის თანახმად, ტრამპის გუნდი ინაუგურაციაზე მსოფლიოს სხვა ლიდერების მიწვევასაც განიხილავს. კერძოდ - უნგრეთის პრემიერ-მინისტრ ვიქტორ ორბანისა, რომელმაც არაერთხელ განაცხადა, რომ დონალდ ტრამპის პოლიტიკური მოკავშირეა. 9 დეკემბერს ორბანი მარ-ა-ლაგოს რეზიდენციაში, ფლორიდაში, შეხვდა დონალდ ტრამპს.
აშშ-ის პრეზიდენტების ინაუგურაციებზე, როგორც წესი, იწვევენ უცხოეთის ქვეყნების ელჩებსა და სხვა დიპლომატებს. სახელმწიფო დეპარტამენტის თანახმად, 1874 წლიდან ამ ცერემონიაში არცერთ უცხოელ ლიდერს არ მიუღია მონაწილეობა.
English (US) · 
Georgian (GE) ·