სიმონე ინძაგის ემოციური კომენტარი ჩემპიონთა ლიგის ფინალის შემდეგ

ჩემპიონთა ლიგის 2025 წლის ფინალში "ინტერმა" მტკივნეული მარცხი იწვნია – მილანური გრანდი "პარი სენ-ჟერმენთან" ანგარიშით 0:5 დამარცხდა. მატჩის დასრულების შემდეგ "ინტერის" მთავარი მწვრთნელი, სიმონე ინძაგი, მედიის წინაშე გამოჩნდა და ღიად ისაუბრა როგორც იმედგაცრუებაზე, ასევე მადლიერებაზე გუნდის მიმართ.

ინძაგიმ აღნიშნა, რომ "პარი სენ-ჟერმენმა" დამსახურებულად მოიპოვა გამარჯვება და თასი. მისი თქმით, მატჩი არაერთ ასპექტში პარიზელთა უპირატესობით წარიმართა – მეტოქე უკეთესად გამოიყურებოდა როგორც ტექნიკურად, ისე ტაქტიკურად. მიუხედავად ასეთი მძიმე შედეგისა, მწვრთნელი მიიჩნევს, რომ მისი ფეხბურთელები ღირსეულად იბრძოდნენ მთელი სეზონის განმავლობაში.

„ჩვენ დასაწყისიდანვე რთული ბრძოლა გვქონდა და უნდა ვაღიაროთ, რომ მეტოქე უკეთესი იყო. თუმცა ვამაყობ ჩემი ბიჭებით – 58 მატჩი გავატარეთ და ყოველთვის მაქსიმუმს ვაკეთებდით. შეიძლება ტიტული ვერ მოვიპოვეთ, მაგრამ გუნდმა გულშემატკივარს პატივი სცა თავისი თავდადებით,“ – განაცხადა ინძაგიმ.

რაც შეეხება მის მომავალს კლუბში, ინძაგი აცხადებს, რომ ამ ეტაპზე გადაწყვეტილება არ მიუღია. მისი ყურადღება ახლა ემოციების გადახარშვას და გუნდის გაძლიერებას ექცევა, რადგანაც, როგორც თავად ამბობს, მარცხი ზოგჯერ საუკეთესო მასწავლებელია.