3 days ago
11
აზერბაიჯანული სატელეკომუნიკაციო კომპანია AzerTelecom აცხადებს, რომ სომხურ ოპერატორ Telecom Armenia-სთან შეთანხმება გააფორმა, რომლის მიხედვითაც სომხეთის მიმართულებით საერთაშორისო ინტერნეტტრაფიკის ტრანზიტი კომპანიის ინფრასტრუქტურის საშუალებით განხორციელდება.
კომპანიის ინფორმაციით, შეთანხმება რეგიონში ინტერნეტკავშირის მარშრუტების დივერსიფიკაციას, სატელეკომუნიკაციო ქსელების მდგრადობის გაძლიერებასა და ტელეკომუნიკაციების სფეროში რეგიონული თანამშრომლობის განვითარებას ისახავს მიზნად.
AzerTelecom-ის განმარტებით, ახალი მარშრუტები ინტერნეტმომსახურების საიმედოობას გაზრდის და შესაძლო ტექნიკური შეფერხებების შემთხვევაში ალტერნატიული კავშირის უზრუნველყოფას შეუწყობს ხელს.
კომპანია აღნიშნავს, რომ ეს შეთანხმება ბოლო თვეებში აზერბაიჯანსა და სომხეთს შორის განხორციელებული ეკონომიკური თანამშრომლობის ერთ-ერთი პროექტია.
AzerTelecom-ის განცხადებაში ასევე ნათქვამია, რომ მანამდე დაიწყო აზერბაიჯანიდან სომხეთში დიზელის საწვავისა და საავტომობილო ბენზინის ექსპორტი, ხოლო რუსეთიდან და ყაზახეთიდან სომხეთში გაგზავნილი მარცვლეულისა და სასუქის ნაწილის ტრანზიტი აზერბაიჯანის ტერიტორიის გავლით განხორციელდა.
კომპანიის ცნობით, აღნიშნული თანამშრომლობა რეგიონული კავშირების გაძლიერებასა და ინფრასტრუქტურული ურთიერთქმედების გაფართოებას ემსახურება.
English (US) · 
Georgian (GE) ·