სომხურ-აზერბაიჯანული ურთიერთობების დასარეგულირებლად საჭიროა დიალოგი — მილერი

ამერიკის შეერთებული შტატების სახელმწიფო დეპარტამენტის პრესსამსახურის ხელმძღვანელმა მეთიუ მილერმა 8 აპრილს გამართულ ბრიფინგზე განაცხადა, რომ სომხეთსა და აზერბაიჯანს შორის ურთიერთობები დიალოგით უნდა დარეგულირდეს.

მილერმა ბრიფინგზე უპასუხა კითხვას, რომელიც ეხებოდა სომხეთსა და აზერბაიჯანს შორის ურთიერთობების რეგულირების საკითხს, გასულ კვირას ორ სახელმწიფოს შორის მომხდარი შეტაკებების ფონზე. ასევე, ხაზი გაესვა ვაშინგტონის როლს აღნიშნული კონფლიქტის მოგვარებასთან დაკავშირებით.

„ჩვენ ნათლად განვაცხადეთ, რომ ამ კონფლიქტის მოგვარების გზა საბოლოოდ მოლაპარაკების მაგიდასთან დგას. არ მსურს, მომავალ შეხვედრებზე საუბარი, მაგრამ ჩვენ ყოველთვის მივესალმებით დიალოგს. როდესაც სახელმწიფო მდივანი [ენტონი ბლინკენი] დაუკავშირდა როგორც სომხეთის, ასევე აზერბაიჯანის ლიდერებს, მან ნათლად დაგვანახა, რომ საჭიროა ორ მხარეს შორის დიალოგი. ჩვენ მოხარულები ვართ, ვითამაშოთ ის როლი, რომელიც ხელს შეუწყობს ამ დიალოგს და გავაგრძელებთ ამას, მაგრამ მე არ მსურს, კონკრეტული მომავალი შეხვედრების წინასწარ განხილვა,“ — განაცხადა მილერმა ბრიფინგზე.

ამერიკის შეერთებული შტატების სახელმწიფო მდივანმა ენტონი ბლინკენმა ქვეყნების ლიდერებთან ცალკე საუბრისას განაცხადა, რომ ისინი მზად არიან, ითამაშონ თავიანთი როლი აზერბაიჯანსა და სომხეთს შორის დიალოგში.

„თუმცა, ვფიქრობ, ნაადრევია იმის თქმა, იქნება თუ არა რაიმე შეხვედრა უახლოეს მომავალში,“ — განაცხადა აშშ-ის სახელმწიფო მდივანმა.

8 მარტს სომხეთის საგარეო საქმეთა მინისტრმა არარატ მიროზიანმა თურქულ საინფორმაციო სააგენტო „Anadolu-სთან“ ინტერვიუში განაცხადა, რომ სომხეთს სურს, ალმა-ათის დეკლარაცია აზერბაიჯანთან სამშვიდობო ხელშეკრულების პროექტში შევიდეს, მაგრამ ამ საკითხზე ერევანმა ბაქოსგან ვერ მიიღო დადებითი პასუხი.

მიროზიანმა ხაზი გაუსვა სომხეთის განზრახვას, გამოიყენოს აზერბაიჯანთან მოლაპარაკების პროცესისგან შემოთავაზებული ყველა შესაძლებლობა, სამშვიდობო დღის წესრიგისადმი ერევანის ერთგულების დასადასტურებლად.

„ჩვენ ვაგრძელებთ მოლაპარაკებებს აზერბაიჯანთან სამშვიდობო შეთანხმების გაფორმებასთან დაკავშირებით. ჩვენ ვაგრძელებთ ამ პროცესს კავკასიასა და მთლიანად სამხრეთ კავკასიის რეგიონში სტაბილურობისა და მშვიდობის განმტკიცების მიზნით,“ — განაცხადა მიროზიანმა.

სომხეთის საგარეო საქმეთა მინისტრმა აღნიშნა, რომ მხარეებს შორის არაერთი უთანხმოებაა, მაგრამ ზოგიერთ მათგანზე შეთანხმება მიღწეულია.

მიროზიანის თქმით, ორ ძირითად საკითხზე მხარეებს განსხვავებული მიდგომები აქვთ.

ამ საკითხებიდან პირველი ეხება ორ ქვეყანას შორის საზღვრების განსაზღვრის პრინციპს, ხოლო მეორე — რეგიონულ კომუნიკაციებსა და სატრანსპორტო მარშრუტებს.

სომხეთსა და აზერბაიჯანს შორის ამ დრომდე არ არის ხელმოწერილი სამშვიდობო შეთანხმება, რომელზეც მხარეები 2023 წლის შემოდგომიდან მუშაობენ.

1991 წლის ალმა-ათის დეკლარაციის თანახმად, ყოფილი სსრკ ქვეყნები უნდა აღიარებდნენ ერთმანეთის სახელმწიფო საზღვრებს.