სტრატეგიული პარტნიორობის დამყარების შემდეგ ჩინეთისგან სამხედრო ტექნიკის შესყიდვა დავიწყეთ - ალიევი

„გასულ წელს ჩინეთის სახალხო რესპუბლიკაში ჩემი ოფიციალურმა ვიზიტმა და ყოვლისმომცველი სტრატეგიული პარტნიორობის დეკლარაციის ხელმოწერამ ჩვენი თანამშრომლობის ძალიან სერიოზული გაღრმავება გამოიწვია ყველა სფეროში“, - განაცხადა პრეზიდენტმა ილჰამ ალიევმა 13 ივლისს ყარაბაღში, ქალაქ შუშაში გამართულ მედიაფორუმზე.

„ეს მოიცავს პოლიტიკურ, ეკონომიკურ, სატრანსპორტო და ყველა სხვა სფეროს. ჩვენ ძალიან კმაყოფილები ვართ ამით და დიდ მნიშვნელობას ვანიჭებთ ამ თანამშრომლობას“, - განაცხადა ალიევმა.

„აზერბაიჯანმა ჩინეთისგან უკვე შეიძინა გარკვეული სამხედრო პროდუქცია. ზოგიერთი მათგანი წარმოდგენილი იყო ჩვენი [ყარაბაღის მეორე ომში] გამარჯვების მეხუთე წლისთავისადმი მიძღვნილ სამხედრო აღლუმზე. დანარჩენი ამჟამად მიეწოდება ჩვენს ქვეყანას, ზოგიერთი პროექტი კი ჯერ კიდევ განხილვის პროცესშია“.

• 2025 წლის 8 ნოემბერს, ყარაბაღის მეორე ომში გამარჯვების მეხუთე წლისთავზე ბაქოში სამხედრო აღლუმი გაიმართა;
• აღლუმზე წარმოდგენილ ტექნიკას შორის იყო ჩინური წარმოების შორი მოქმედების საჰაერო თავდაცვის სისტემა HQ-9;
• აზერბაიჯანს ასევე შესყიდული აქვს ჩინურ-პაკისტანური წარმოების ავიაგამანადგურებელი CAC/PAC JF-17 Thunder.

„ჩვენ ძალიან დაინტერესებულები ვართ სამხედრო-ტექნიკური თანამშრომლობის განვითარებით“, - დასძინა აზერბაიჯანის პრეზიდენტმა.

მისი თქმითვე, „აზერბაიჯანში ახლა უფრო მეტი ჩინური კომპანია ოპერირებს. ზოგიერთი მათგანი უკვე ახორციელებს მსხვილ საინვესტიციო პროექტებს, ზოგი კი მონაწილეობს სხვადასხვა ინფრასტრუქტურულ პროექტებში“.

ჩინეთის სახალხო რესპუბლიკას „ყოვლისმომცველი სტრატეგიული პარტნიორობის“ დეკლარაცია აქვს მიღებული სამხრეთ კავკასიის სამივე სახელმწიფოსთან, აზერბაიჯანთან, სომხეთთან და საქართველოსთან.