სტუბმა მასკს მოუწოდა, გახსნას Starlink-ი რუსეთის ტერიტორიის სიღრმეში დარტყმებისთვის

სტუბმა Reuters-თან ინტერვიუში თქვა, რომ ამგვარი ნაბიჯი მრავალი ადამიანის სიცოცხლეს გადაარჩენს.

კიევში აცხადებენ, რომ Starlink-ზე წვდომა უკრაინულ შორ მანძილზე მოქმედ დრონებს მისცემს საშუალებას, ზამთრის დადგომამდე მაღალი სიზუსტით გაანადგურონ რუსეთის მობილური სარაკეტო კომპლექსები. ანალოგიური თხოვნით უკრაინის პრეზიდენტმა ვოლოდიმირ ზელენსკიმ ჯერ კიდევ ივლისში მიმართა აშშ-ის პრეზიდენტ დონალდ ტრამპს, თუმცა პროცესი მოითხოვს უშუალოდ ილონ მასკის თანხმობას. უკრაინული კომპანია Fire Point-ის მონაცემებით, რუსეთის ტერიტორიაზე სისტემის ჩართვა საბრძოლო მოქმედებათა რადიუსს 500 კილომეტრამდე გაზრდის.

ფინეთის პრეზიდენტმა ასევე დაასახელა უკრაინის მხარდაჭერის სამი მთავარი პრიორიტეტი მოსალოდნელი ზამთრის პერიოდისთვის: საჰაერო თავდაცვის გაძლიერება (მათ შორის Starlink-ის მეშვეობით), ენერგოგენერატორების მიწოდება და ფინანსური დახმარება.