"სცადეს ვიდეოს გადაღება, სადაც მოგვთხოვეს გვეთქვა ფრაზა: "ხარება მაგარი კაცია" - აქციაზე დაკავებული მიშა მეტრეველი

3 დეკემბერს პროევროპული აქციების პარალელურად ბესიკის ქუჩაზე დაკავებული მოქალაქე მიშა მეტრეველი 48 საათიანი ადმინისტრაციული პატიმრობისა და სასამართლოში მისი საქმის განხილვის შემდეგ ფეისბუკზე წერს დაკავებისას ცემის გამოცდილებას. მისი მონათხრობის მიხედვით, ის განსაკუთრებულ დავალებათა დეპარტამენტის შავნიღბიანმა წევრებმა დაახლოებით ღამის პირველიდან ორ საათამდე დროის შუალედში დააკავეს, შემდეგ კი ე.წ. დაკავების ფურგონიან ავტომობილში ჩასვეს, სადაც ფიზიკურად გაუსწორდნენ.

"დაკავების დროს მოვუწოდე, რომ ჩავბარდი და არ ვაპირებდი წინააღმდეგობის გაწევას, მიუხედავად ამისა დაიწყეს ჩემი ჩხრეკა და არაპროპორციული ძალის გამოყენება.

ერთ-ერთი მათგანი გამოეყო და მოუწოდა, რომ არ გაეგრძელებინათ ჩემზე ფიზიკური ზეწოლა, რადგან მიმდებარე კორპუსებიდან ყველაფერი ჩანდა, შემდეგ მოხდა ჩემი მოთავსება 112 ის კუთვნილ სატვირთო ავტომობილში (Ford Transit) სადაც სხვა დაკავებულებთან ერთად დაიწყეს ჩვენი "დასჯა".

ფიზიკურად გვისწორდებოდა 6 შავნიღბიანი ერთდროულად და შემდეგ სცადეს ვიდეოს გადაღება, სადაც მოგვთხოვეს გვეთქვა ფრაზა: "ხარება მაგარი კაცია" რაზეც მტკიცე უარი მიიღეს ჩვენგან და ფიზიკური ანგარიშწორება კიდევ 2 რაუნდის განმავლობაში გაგრძელდა"

ფურგონში ცემის შემდეგ მიშა მეტრეველი საპატრულო ეკიპაჟმა წინასწარი დაკავების იზოლატორში გადაიყვანა, სადაც 30 საათი გაატარა. მისი საქმე სასამართლოში უკვე განიხილეს.

6 დეკემბრის მონაცემებით, პროევროპულ აქციებზე, რვა დღის განმავლობაში, ადმინისტრაციული სამართალდარღვევისთვის დაკავებულია 338 პირი, სისხლის სამართლის ბრალდებით 26. 400-მდე დაკავებულიდან დაახლოებით 80 სხეულის მძიმე დაზიანებებით კლინიკაში გადაიყვანეს.