radiotavisupleba ახალი ამბები 
აშშ-ის პრეზიდენტმა დონალდ ტრამპმა განაცხადა, რომ რუსეთის მიერ უკრაინის წინააღმდეგ წარმოებული ომისა და ირანთან კონფლიქტის დარეგულირების შესახებ მოლაპარაკებები „თავბრუდამხვევი სიჩქარით“ ვითარდება. ამის შესახებ მან დაწერა თავის სოციალურ ქსელ Truth Social-ში.
„მე რვა ომი დავარეგულირე და ყველა იმ ქვეყნის პრეზიდენტებმა და პრემიერ-მინისტრებმა, რომლებსაც დავეხმარე, წერილები გაუგზავნეს ნორვეგიის ნობელის კომიტეტს. ახლა ვაპირებ კიდევ ორი კონფლიქტის დარეგულირებას ან მოგებას - ირანთან და რუსეთსა და უკრაინას შორის. ორივე პროცესი თავბრუდამხვევი სიჩქარით ვითარდება“, - დაწერა ტრამპმა.
კრემლის პრესმდივანმა დმიტრი პესკოვმა განაცხადა, რომ 9 ოქტომბერს ტრამპისა და რუსეთის პრეზიდენტ ვლადიმირ პუტინის სატელეფონო საუბრის მნიშვნელოვანი ნაწილი უკრაინის წინააღმდეგ ომს დაეთმო. პესკოვის თქმით, პუტინმა „გაგებით მიიღო“ ამერიკული მხარის ზოგიერთი წინადადება, რომლებიც დეესკალაციისკენ არის მიმართული. ამ წინადადებების შინაარსი პესკოვს არ გაუმჟღავნებია.
პუტინის თანაშემწის, იური უშაკოვის თქმით, ტრამპთან საუბარში რუსეთის პრეზიდენტმა აღნიშნა, რომ სახელმწიფო დუმის არჩევნების წინ მოსკოვი თითქოს მზად იყო უკრაინისა და აშშ-ის მონაწილეობით სამმხრივი შეხვედრების განახლებისთვის, თუმცა ახლა „ვითარება სხვაგვარია“. უშაკოვმა კიევი მოლაპარაკებების უახლოეს ხანში განახლების შესაძლებლობის ჩაშლაში დაადანაშაულა კენჭისყრის დღეებში რუსეთზე უკრაინის შეიარაღებული ძალების დარტყმების გამო.
პესკოვმა ასევე თქვა, რომ პუტინმა, თეირანთან შეთანხმებით, ტრამპს გადასცა ირანის ხელისუფლების პოზიცია აშშ-სა და ირანს შორის კონფლიქტის შესაძლო დარეგულირებასთან დაკავშირებით.
მსოფლიო ბაზარზე რუსული დიზელის საწვავის მიწოდების შესახებ ვაშინგტონსა და მოსკოვს შორის შეთანხმების ფონზე, მაიამიში მოლაპარაკებებზე მყოფმა უკრაინის დელეგაციამ შეამოკლა აშშ-ში ვიზიტი, იუწყება Financial Times-ი (FT) წყაროზე დაყრდნობით.
ტრამპის წარმომადგენლებთან უკრაინის დელეგაციის მოლაპარაკებები მაიამიში მიმდინარეობდა 9 ოქტომბერს და მეორე დღესაც უნდა გაგრძელებულიყო. FT-ის მონაცემებით, შეხვედრების მეორე დღე მას შემდეგ გაუქმდა, რაც, უკრაინის მხარისთვის სრულიად მოულოდნელად, აშშ-სა და რუსეთს შორის შეთანხმება იქნა მიღწეული დიზელის საწვავის შესახებ.
უკრაინის პრეზიდენტმა ვოლოდიმირ ზელენსკიმ გააკრიტიკა დეესკალაციის შესახებ გრძელვადიანი შეთანხმების გარეშე სანქციების შემსუბუქება. მან წამოაყენა წინადადება, რომ ზამთრის პერიოდში ორმხრივად შეწყდეს დარტყმები რუსეთისა და უკრაინის ენერგეტიკულ ინფრასტრუქტურაზე.
