უგუნდოდ ყოფნის პერიოდი დასრულებულია - გველესიანი ახალ კლუბს შეუერთდა

საქართველოს ეროვნული ნაკრების მცველი გიორგი გველესიანი კარიერას კვლავ ირანში განაგრძობს. გამოცდილი ფეხბურთელი სამი წლის შემდეგ დაბრუნდა „სეპაჰანში“, სადაც ოფიციალურად კონტრაქტიც გააფორმა.

გველესიანი უკვე კარგად იცნობს ისპაჰანის კლუბს — 2019-2022 წლებში სწორედ „სეპაჰანის“ მაისურით ასპარეზობდა. იმ პერიოდში ქართველმა 77 შეხვედრაში მიიღო მონაწილეობა და 10 გოლი გაიტანა.

„ძალიან მიხარია აქ დაბრუნება. ისპაჰანში სამი დაუვიწყარი წელი გავატარე და ახლა მიზანი მარტივია – გუნდთან ერთად მაქსიმალური შედეგის მიღწევა,“ – განაცხადა გველესიანმა პრეზენტაციაზე.

გველესიანის საფეხბურთო გზა „დინამო თბილისიდან“ დაიწყო, რის შემდეგაც ირანში გადაბარგდა. კარიერის განმავლობაში სხვადასხვა ირანულ კლუბში უთამაშია: „ნასაჯიში“, „ზობ აჰანში“, „სეპაჰანში“ და „პერსეპოლისში“.