radiotavisupleba ახალი ამბები 
16 სექტემბერს დილით რუსეთის ჯარებმა უპილოტო საფრენი აპარატებით შეტევა მიიტანეს უკრაინაზე, მათ შორის დედაქალაქ კიევზე. ადგილობრივი ხელისუფლების ცნობით, დაიღუპნენ და დაშავდნენ მშვიდობიანი მოქალაქეები.
დრონებით დარტყმის ერთ-ერთი სამიზნე იყო დნეპროპეტროვსკის ოლქის ნიკოპოლის რაიონი. საოლქო-სამხედრო ადმინისტრაციის ხელმძღვანელ ოლექსანდრ განჟას ინფორმაციით, ერთ-ერთი დრონი ავტობუსს მოხვდა.
ადგილზე დაიღუპა ხუთი ადამიანი. დაიჭრა შვიდი. განჟამ სოციალური ქსელებით გაავრცელა მიკროავტობუსის ფოტოც.
დრონებით შეტევა იყო კიევზე. ქალაქის სამხედრო ადმინისტრაციის და მერის, ვიტალი კლიჩკოს ცნობით, კიევის სვიატოშინსკის რაიონში ხანძარი გაუჩნდა სასაწყობე შენობას. რისი საწყობი დაიწვა, არ დაუკონკრეტებიათ. კლიჩკოს ინფორმაციით, დაშავდა ერთი ადამიანი.
რუსეთის თავდაცვის სამინისტროს ოფიციალური არხებით 16 სექტემბერს დილით გავრცელებული ცნობით, კიევში დაარტყეს ავტოსატრანსპორტო საწარმოს, რომელიც უკრაინის არმიისთვის სპეციალურ ავტომობილებს აწარმოებს.
უკრაინის რკინიგზის ინფორმაციით, დრონით დარტყმა იყო სამგზავრო მატარებელზეც, რომელიც კიევი-ნიკოლაევის რეისს ასრულებდა. სარკინიგზო კომპანიის თანახმად, შეტევის შესახებ წინასწარი შეტყობინების შედეგად მატარებლიდან ბრიგადის წევრებისა და მგზავრების ევაკუაცია დროულად მოხერხდა და არავინ დაშავებულა.
