radiotavisupleba ახალი ამბები 
უკრაინის თავდაცვის სამინისტროს დაზვერვის მთავარმა სამმართველომ გამოავლინა რუსეთის სამხედროები, რომლებიც მონაწილეობდნენ 2 ნოემბერს ზაპოროჟიეს ოლქის დაბა კომიშუვახაზე განხორციელებულ თავდასხმაში. ამის შესახებ უწყების ტელეგრამის არხი იუწყება.
დაზვერვის მონაცემებით, დაბაზე დარტყმა დაგეგმა პოლკოვნიკმა ფიოდორ ზუბაკოვმა, რომელიც ხელმძღვანელობს დაჯგუფება „დნეპრის“ შტაბის საცეცხლე ჯგუფს.
უშუალოდ იერიშში მონაწილეობდა რუსეთის შეიარაღებული ძალების გენერალური შტაბის რეზერვის ავიაციის სპეციალური საბრძოლო ჯგუფის №5 ტაქტიკური საავიაციო ჯგუფი.
უკრაინის პრეზიდენტმა ვოლოდიმირ ზელენსკიმ ადრე განაცხადა, რომ რუსეთის ჯარებმა კომიშუვახაზე ცხრა საავიაციო ბომბი ჩამოაგდეს. უკრაინის დაზვერვის მთავარი სამმართველოს ცნობით, ამ ოპერაციაში ჩართული იყო ოთხი სუ-34 ტიპის თვითმფრინავი, რომლებსაც მართავდნენ შემდეგი მფრინავები:
- კაპიტანი სერგეი ელისეევი;
- კაპიტანი დმიტრი ზვერევი;
- უფროსი ლეიტენანტი როდიონ პლოტნიკოვი;
- უფროსი ლეიტენანტი ნიკიტა იგნატიევი;
- უფროსი ლეიტენანტი მაქსიმ სოკოლენკო;
- ლეიტენანტი ვადიმ პერეკრესტი.
დაზვერვა ასევე აღნიშნავს, რომ კიდევ ერთი თვითმფრინავის ეკიპაჟი ჯერჯერობით დადგენილი არ არის.
კომიშუვახაზე განხორციელებული დარტყმის შედეგად დაიღუპა 55 ადამიანი. ზელენსკის თქმით, ჯერ იერიში მიიტანეს იმ ადამიანებზე, რომლებიც უმოქმედო სკოლის შენობაში მოწყობილ ჰუმანიტარული დახმარების გაცემის პუნქტში იყვნენ შეკრებილნი, ხოლო შემდეგ ადგილზე მისულ მაშველებსა და პოლიციელებზე. სამძებრო-სამაშველო სამუშაოები უკვე მეექვსე დღეა გრძელდება.
