უკრაინის უსაფრთხოების სამსახურის ცნობით, ყირიმში დაარტყეს რუსეთის სამხედრო აეროდრომს

უკრაინამ რუსეთის მიერ ანექსირებულ ყირიმზე მორიგი შეტევის სამიზნედ დაასახელა სამხედრო აეროდრომი „საკი“, სადაც დისლოცირებულია რუსული არმიის გამანადგურებლები.

ამ რაიონში აფეთქებები 30 ივნისიდან 1 ივლისის ღამით იყო.

1 ივლისს დღისით უკრაინის უსაფრთხოების სამსახურმა გამოაცხადა, რომ დრონებით „წარმატებით დაარტყეს“ აეროდრომის ანგარებს და „დადასტურებულია ხუთი მოხვედრა“. წინასწარი მონაცემებით, დარტყმის მომენტში ორ ანგარში იმყოფებოდნენ გამანადგურებლები Су-30 და Су-30СМ.

აეროდრომ „საკისთან“ მასშტაბური ხანძრის შესახებ თანამგზავრულ ფოტოებზე დაყრდნობით 1 ივლისს დილით წერდა ტელეგრამ-არხი „კრიმსკი ვეტერ“.

• რუსეთის თავდაცვის სამინისტროს ეს აეროდრომი ყირიმის საკის რაიონში, დაბა ნოვოფიოდოროვკაში მდებარეობს. 2014 წელს, ყირიმის ანექსიის შემდეგ რუსეთმა აეროდრომზე განათავსა 43-ე საზღვაო მოიერიშე საავიაციო პოლკი.
• „საკი“ ადრეც არაერთხელ იყო უკრაინის თავდაცვის ძალების სამიზნე.

უკრაინის უსაფრთხოების სამსახურმა 1 ივლისს განაცხადა, რომ აეროდრომ „საკის“ დაარტყეს რუსეთზე „ზემოქმედების 40-დღიანი ოპერაციის“ ფარგლებში პრეზიდენტ ზელენსკის მიერ განსაზღვრული დავალებების შესასრულებლად.

• უკრაინის პრეზიდენტმა უსაფრთხოების სამსახურს 25 ივნისს დაუმტკიცა რუსეთზე „ზემოქმედების 40-დღიანი ოპერაცია“. ზელენსკის თანახმად, ოპერაციის მიზანია აგრესორ სახელმწიფოს ომის დასრულებისკენ უბიძგონ.

რუსეთის თავდაცვის სამინისტროს აეროდრომ „საკიზე“ შეტევის შესახებ არანაირი ცნობა არ გაუვრცელებია. 1 ივლისს დილით გამოქვეყნებული ზოგადი ინფორმაციის მიხედვით, გასული ღამიდან დილის რვა საათამდე რუსეთის 16 რეგიონში და ყირიმში „გზად დაიჭირეს და გაანადგურეს“ 179 უკრაინული დრონი.