radiotavisupleba ახალი ამბები 
უნგრეთის მთავრობა რუსეთის დიპლომატიური მისიის ათ თანამშრომელს აძევებს. ამის შესახებ უნგრეთის საგარეო საქმეთა მინისტრმა ანიტა ორბანმა 8 სექტემბერს განაცხადა.
მისი თქმით, უნგრეთის საგარეო საქმეთა სამინისტრომ ბუდაპეშტში რუსეთის ელჩს აცნობა, რომ „უნგრეთის ხელისუფლების შეფასებით, რუსეთის მისიის ათმა თანამშრომელმა უნგრეთში ვენის კონვენციით გათვალისწინებული დიპლომატების სტატუსის შეუთავსებელი საქმიანობა განახორციელა“.
ორბანმა განაცხადა, რომ ამ პირების, რომელთა ვინაობა და თანამდებობებიც არ სახელდება ქვეყნის დატოვების მოთხოვნა „უნგრეთის უსაფრთხოებისა და სუვერენიტეტის უზრუნველყოფას ემსახურება“, მაგრამ არ ნიშნავს რუსეთთან დიპლომატიური ურთიერთობების გაწყვეტას.
„უნგრეთი აპირებს შეინარჩუნოს აუცილებელი დიალოგი ურთიერთპატივისცემისა და დადგენილი წესების დაცვის საფუძველზე“, - წერს მინისტრი.
უკრაინაში ომისა და რუსეთსა და ევროკავშირს შორის ურთიერთობების ზოგადი გაუარესების ფონზე, ევროკავშირის ბევრმა ქვეყანამ გააძევა რუსი დიპლომატიური პერსონალი, დახურა საკონსულოები და სხვა რუსული დაწესებულებები. საპასუხოდ იმოქმედა რუსეთმაც. თუმცა, უნგრეთმა წინა პრემიერის ვიქტორ ორბანის პირობეში თავი შეიკავა მსგავსი ნაბიჯებისგან. ბოლოს რუსი დიპლომატი ბუდაპეშტიდან 2018 წლის გაზაფხულზე გააძევეს. ერთდროულად 10 დიპლომატის გაძევება უნგრეთისთვის უპრეცედენტო ზომაა. ამის კონკრეტული მიზეზი ჯერ არ გახმაურებულა.
მაისში პეტერ მადიარის მეთაურობით ახალი მთავრობის მოსვლის შემდეგ, უნგრეთმა რუსეთის კრიტიკა დაიწყო უკრაინაზე თავდასხმების გამო და შეწყვიტა ევროკავშირის დონეზე სანქციების დაბლოკვა თუმცა, ბუდაპეშტი კვლავ არ აწვდის უკრაინას იარაღს.
მოსკოვი ჯერ არ გამოხმაურებია უნგრეთის ხელისუფლების გადაწყვეტილებას.
