„ქართული ოცნება“ აგვისტოს ომის დაწყების თარიღად ისევ 8 აგვისტოს ასახელებს და პასუხისმგებლობას სააკაშვილის ხელისუფლებას აკისრებს

ასე მოხდა ომის მე-18 წლისთავზეც. პარტიის ლიდერები და სახელმწიფო სტრუქტურების ხელმძღვანელებმა ომში დაღუპულთა მემორიალი ყვავილებით 8 აგვისტოს შეამკეს და გმირების ოჯახის წევრებს შეხვდნენ.

7 აგვისტოს მივიდნენ ომში დაღუპულების პატივის მისაგებად მემორიალთან ოპოზიციური პარტიების წარმომადგენლები.

„ქართული ოცნების“ ლიდერებმა პოლიტიკური განცხადებებისას ომის დაწყებაში კიდევ ერთხელ დაადანაშაულეს „ნაციონალური მოძრაობა“ და დამაზუსტებელ კითხვაზე, ეს ნიშნავს, თუ არა მათი მხრიდან მტკიცებას, რომ ომი საქართველომ დაიწყო, იმდროინდელი ხელისუფლება საქართველოსგან გამიჯნეს.

პრემიერ-მინისტრმა ირაკლი კობახიძემ განაცხადა, რომ ომი 8 აგვისტოს დაიწყო, „8 აგვისტოს შემოვიდა რუსეთის ჯარი.. 7 აგვისტოს რაც მოხდა ეს იყო ის, რომ სააკაშვილის რეჟიმმა დაბომბა ცხინვალი და შემდეგ ხელი მოაწერა რეზოლუციას“.

უკვე მესამე წელია, “ქართული ოცნების” ხელისუფლება ომის დაწყებაში ღიად ადანაშაულებს არა რუსეთს, არამედ ქართულ მხარეს [წინა ხელისუფლებას]. აგვისტოს ომს “გარე ძალების” – [გლობალური ომის პარტიის/დიპ სტეიტის] დაკვეთად განიხილავს და ასეთ ძალებს დასავლეთში ხედავს.

2024 წლის სექტემბერში, საპარლამენტო არჩევნების წინ, გორში სიტყვით გამოსვლისას, “ქართული ოცნების” დამფუძნებელმა, ბიძინა ივანიშვილმა “ნაციონალური მოძრაობის” ხელისუფლების წარმომადგენლებს “ომის გამჩაღებლები” უწოდა, ხოლო 2008 წლის რუსეთ-საქართველოს ომს - მაშინდელი ხელისუფლების ღალატი.

2024 წლის 29 აპრილს, რუსთაველის გამზირზე პროსამთავრობო აქციაზე გამოსვლისას, ივანიშვილმა გამოაცხადა, რომ საქართველო რუსეთთან “გლობალური ომის პარტიამ” დააპირისპირა და რომ "გლობალური ომის პარტიისთვის" “საქართველოსაც და უკრაინასაც მხოლოდ საზარბაზნე ხორცის ფასი აქვს".

პოლიტიკური პარტიებისა და საზოგადოების ნაწილი მიიჩნევს, რომ 8 აგვისტოს ომის დაწყების მტკიცება რუსული ნარატივია და ომის დაწყების თარიღია 7 აგვისტო, როდესაც პირველი რუსული შეიარაღებული ძალები შემოვიდნენ საქართველოს ტერიტორიაზე.

„ჩვენ ომის დაწყებაში ვადანაშაულებთ სააკაშვილის სისხლიან რეჟიმს...

მოღალატე მთავარსარდალი ჰყავდა მაშინ ფორმალურად ამ ქვეყანას და ჩვენი გმირები შეეწირენ იმას, რომ ჩვენი ე.წ. მთავარსარდალი იყო მოღალატე, აგენტი და მოქმედებდა უცხო ძალების ინტერესების დაკვეთით“, - განაცხადა კობახიძემ.

კითხვას, არის თუ არა რუსეთი ოკუპანტი ასე უპასუხა:

„რუსეთმა განახორციელა საქართველოს ტერიტორიების 20 ოკუპაცია და რა თქმა უნდა ნაცმოძრაობის ღალატი ვერანაირად ვერ გადაფარავს ამ დანაშაულს, ეს იყო დანაშაული ჩვენი სახელმწიფოს წინაშე... ოკუპაცია დანაშაულია... სააკაშვილისა და მისი რეჟიმის ღალატი ვერ გადაფარავს ოკუპაციას.. ერთ მხარეს იყო სააკაშვილის და მისი რეჯიმის ღალატი, მეორე მხარეს იყო ოკუპაცია, რომელიც განხორციელდა რუსეთის ფედერაციის მხრიდან, ჩვენ მთავარია, რომ ორივე ფაქტს მივცეთ სათანადო შეფასება...

სააკაშვილის რეჟიმის მიერ ომის დაწყებას მოჰყვა კონკრეტული გაგრძელება, ეს გაგრძელება იყო ოკუპაცია და ე.წ. აღიარება“, - განაცხადა ირაკლი კობახიძემ.

მისივე მტკიცებით, ნაციონალურმა მოძრაობამ ევროპის საბჭოს საპარლამენტო ასამბლეის რეზოლუციაზე ხელის მოწერით თავად დაადასტურა, რომ ომი მათ დაიწყეს:

„რეზოლუციაში სიტყვასიტყვით წერია: ფართომასშტაბიან საომარ ფაზაში კონფლიქტი გადაიზარდა საააკაშვილის რეჟიმის მიერ ცხინვალის დაბომბვის შემდეგ...სააკაშვილის რეჟიმი იქ არ წერია...ქართული მხარე წერია. ასე მე ვციტირებ“

- თქვენ ისე გესმით რომ საქართველომ დაიწყო ომი?

„ამას ნიშნავს - ფართომასშტაბიანი საომარი მოქმედებები სხვა სიტყვებით არის ომი....ამას სამარცხვინოდ ხელი მოაწერა.. საუბარია იქ რუსეთის პასუხზეც...ცხინვალის დაბომბვას მოჰყვა რუსეთის პასუხი. ამას ხელი მოაწერა თქვენმა პარტიამ“, - ამბობს ირაკლი კობახიძე.

ევროპის საბჭოს საპარლამენტო ასამბლეის 2008 წლის 3 ოქტომბრის რეზოლუცია „საქართველოსა და რუსეთს შორის ომის შედეგები“ რუსეთ-საქართველოს ომის შესახებ ერთ-ერთი პირველი ოფიციალური საერთაშორისო დოკუმენტია, რომელიც საუბრობს ომამდე მიმდინარე პროცესებზე, ომის მსვლელობაზე და მის შედეგებზე. რეზოლუციამდე ერთ დღით ადრე საქართველოს ტერიტორიაზე ფუნქციონირება ევროკავშირის სადამკვირვებლო მისიამ (EU Monitoring Mission/EUMM) დაიწყო.

რეზოლუცია არ ასახელებს მხარეს რომელმაც დაიწყო ომი, არამედ აღნიშნავს რომ „იმის გამო, რომ ომის დაწყების გარშემო არსებულ ფაქტებს სადავოდ მიიჩნევს როგორც საქართველოს, ასევე რუსეთის მხარე, ისინი უნდა იქნეს დადგენილი ობიექტურად, დამოუკიდებელი საერთაშორისო გამოძიების მიერ.“

7 აგვისტოს 17 წელი შესრულდა რუსეთ-საქართველოს ომის დაწყებიდან.

ხუთდღიანმა ომმა საქართველოს 400-ზე მეტი მოქალაქის - სამხედრო და სამოქალაქო პირების სიცოცხლე იმსხვერპლა და 30 000-მდე დევნილად აქცია.

რუსეთის მიერ ოკუპირებულია საქართველოს ტერიტორიის 20% - აგვისტოს ომის შემდეგ რუსეთმა ე.წ. დამოუკიდებელ რესპუბლიკებად აღიარა საქართველოს ორი ტერიტორია, ცხინვალის რეგიონი და აფხაზეთი.

საქართველოს სახელმწიფო სტრუქტურების წარმომადგენლებიც შვიდი აგვისტოს ნაცვლად, რვა აგვისტოს ავრცელებენ რუსეთ-საქართველოს ომის მე-18 წლისთავთან დაკავშირებულ განცხადებებს.

საგარეო საქმეთა სამინისტროც გავრცელებულ განცხადებაში ომის დაწყების თარიღად 8 აგვისტოს ასახელებს. განცხადებაში ნათქვამია, რომ რუსეთი დღემდე არ ასრულებს ევროკავშირის შუამავლობით 2008 წლის 12 აგვისტოს დადებულ ცეცხლის შეწყვეტის შეთანხმებას. უწყების შეფასებით, რუსეთი აგრძელებს ოკუპირებულ რეგიონებში კონტროლის გაფართოებას, მათ მილიტარიზაციას და ფაქტობრივი ანექსიისკენ მიმართულ ნაბიჯებს.

სამინისტროს განცხადებით, ოკუპირებულ ტერიტორიებზე ადამიანის უფლებების დარღვევები, ეთნიკური დისკრიმინაცია და მოსახლეობის იზოლაცია უსაფრთხოებისა და ჰუმანიტარულ მდგომარეობას კიდევ უფრო ამძიმებს. ამასთან, საერთაშორისო ორგანიზაციებისთვის ტერიტორიებზე წვდომის შეზღუდვა ადგილზე ვითარების სრულფასოვან შეფასებას ართულებს.

უწყება აღნიშნავს, რომ საქართველო კონფლიქტის მშვიდობიანი მოგვარების პოლიტიკას აგრძელებს. ამ პროცესში განსაკუთრებული მნიშვნელობა ენიჭება ჟენევის საერთაშორისო მოლაპარაკებებს, სადაც საქართველო რუსეთის მიერ ცეცხლის შეწყვეტის შეთანხმებით ნაკისრი ვალდებულებების შესრულების, დევნილებისა და ლტოლვილების დაბრუნებისა და საერთაშორისო უსაფრთხოების მექანიზმების ამოქმედების საკითხებს აყენებს.

საგარეო საქმეთა სამინისტრო რუსეთს მოუწოდებს, შეწყვიტოს საქართველოს ტერიტორიების უკანონო ოკუპაცია, შეასრულოს 2008 წლის 12 აგვისტოს შეთანხმებით ნაკისრი ვალდებულებები, გაიყვანოს სამხედრო ძალები საქართველოს ტერიტორიიდან და უზრუნველყოს იძულებით გადაადგილებულ პირთა და ლტოლვილთა საკუთარ სახლებში უსაფრთხო და ღირსეული დაბრუნება.

„18 წლის შემდეგ საქართველოს მშვიდობისა და ერთიანობის მიზანი კვლავ უცვლელია“, - ნათქვამია განცხადებაში.