“შენზე დარდმა მომკლა” – შეტყობინება მივიღე…” – ლევან ლორთქიფანიძე

1

,,კავკასიური სახლის” წევრი, ლევან ლორთქიფანიძე:

“შენზე დარდმა მომკლა” – შეტყობინება მივიღე ადამიანისგან, რომელსაც ბევრი სიკეთე გაუკეთებია ჩემთვის, უამრავ ახალ აღმოჩენაში დამხმარებია, ბევრ გზაჯვარედინზე გზის გაკვალვის დროს გაუმართავს ხელი. ეს ამბები ბავშვობაში ხდებოდა, თან ისეთ დროს, როდესაც სახლში არ ვიყავი.

პარალელურად, უამრავმა უძვირფასესმა ადამიანმა მომწერა. რატომღაც ყველანი ცდილობენ, რომ თავი რაღაცად მაგრძნობინონ. ამომრჩევლები უმშვენიერესი პოსტერით შეეგებნენ ჩემს გამოძახებას…

არაჩვეულებრივ ხალხს ჩემი დღევანდელი სასამართლო პროცესის ბედი აღელვებს.

შემრცხვა! სამართლებრივი თვალსაზრისით, არაფერი განსაკუთრებული არ ხდება, არაფერი განსაკუთრებული არ მემუქრება. 14 დღით ჩემი დაპატიმრებაც რომ გაბედონ (რაც თითქმის წარმოუდგენელია), მაგასაც გადავიტან როგორმე, ისეთ რაღაცებს ვიტან წლებია… დამაჯარიმებენ?! მამაჩემის საყვარელი გამონათქვამია: “Не имей сто рублей, а имей сто друзей”… ამ პრინციპით მიცხოვრია და ისე არ დავრჩები.

შემრცხვა! მზია ამაღლობელი მეჩვიდმეტე დღეა შიმშილობს, საბა მეფარიშვილი თუნუქის ღობის დაზიანების გამო ციხეში იტანჯება, მისი მშობლები და მამიდა ვანში, დიხაშხოში კვდებიან ტკივილითა და სიღარიბით… ამ ამბებთან შედარებით ჩემი გამოძახების შემთხვევა მხოლოდ მტვრის ნაწილაკია, მეტი არაფერი!

თუმცა, გარკვეულწილად მესმის ზოგიერთი თქვენგანის დარდისა და აღშფოთების. ჩემს გამოძახებაზე ფიქრის დროს რამდენიმე აზრი ამომიტივტივდა თავში.

შეიძლება სამართლებრივი თვალსაზრისით უბრალო მოვლენასთან გვაქვს საქმე, მაგრამ ამ და ამგავარ გამოძახებებს საშიში პოლიტიკური შინაარსი ახლავს თან:

1. არაფერი დამიშავებია, არაფერი განსაკუთრებული და მოქმედი კანონების საწინააღმდეგოც კი არ ჩამიდენია. რამდენიმე წუთით ასობით ადამიანთან ერთად გადავედი ქუჩაზე და პოლიციის მოწოდებიდან რამდენიმე წუთში მონაწილეობა მივიღე საავტომობილო მოძრაობის გახსნაში.

პატიოსანი და წესიერი საქციელის გამო მაწანწალებენ სასამართლოში, კაპიკ-კაპიკ უნდა მაგროვებინონ ფული, კანონდამრღვევის იარლიყი უნდა მომაკერონ.

წარმოიდგინეთ, რას უზამენ ადამიანს, ვისაც მართლა, ოდნავ მაინც დაუცდება ფეხი. გადაჯეგავენ და მიწასთან გაასწორებენ…

2. “ქართული ოცნება” გვეუბნება: მონაწილეობა დასჯადია! უწყინარ აქციაზე დასწრებაც კი ძვირი დაგიჯდება! ივანიშვილის წინააღმდეგ მშვიდობიან პროტესტს საშინელ, გულის გამაწვრილებელ თავსატეხად გიქცევ! ბეღურებზე ზარბაზნით ვინადირებ, ქუჩაზე 10 წუთით კანონიერი გადასვლის გამო ას სასამართლოს მოვაწყობ.

3. ხომ გახსოვთ, ნეკს თუ დაუთმობ, მთელ სხეულს წაიღებს! დღეს გამოხატვის ელემენტარულ თავისუფლებას ესხმის თავს, ხვალ სამსახურში შემოგივარდება, ზეგ გაიძულებს ქვეყნიდან გაიქცე ან მონა გახდე!“