netgazeti 
აშშ-ის პრეზიდენტის წარმომადგენელი, ჯარედ კუშნერი აცხადებს, რომ დონალდ ტრამპმა მნიშვნელოვანი განხილვა გამართა რამდენიმე ევროპელ ლიდერთან ისეთი ფართო ევროპული უსაფრთხოების არქიტექტურის აუცილებლობაზე, რომელიც ხანგრძლივი მშვიდობის დამყარებას შეუწყობს ხელს.
ჯარედ კუშნერი აშშ-ის პრეზიდენტის წარმომადგენელ სტივ უიტკოფთან პლატფორმა X-ზე განცხადებას ავრცელებს, სადაც მიმდინარე დისკუსიების მიზნების შესახებ საუბრობს.
განცხადებაში აღნიშნულია, რომ ჩვენი მიზანი ისეთი პრაქტიკული შეთანხმებების შემუშავებაა, რომლებიც ყველა მხარის უსაფრთხოების ინტერესების გათვალისწინებას უზრუნველყოფს.
„30 წელზე მეტია, ევროპა და რუსეთი ცდილობენ მდგრადი უსაფრთხოების ჩარჩოს შექმნას. ათწლეულების განმავლობაში არსებული უნდობლობა, ერთმანეთის გამოწვევები უსაფრთხოების სფეროში და ამ ომის დამანგრეველი შედეგები ამ პროცესს განსაკუთრებით რთულ გამოწვევად აქცევს, თუმცა ის აუცილებელია ხანგრძლივი მშვიდობისთვის.
ჩვენი მიზანია, შევამუშავოთ პრაქტიკული შეთანხმებები, რომლებიც უზრუნველყოფს ყველა მხარის უსაფრთხოების ინტერესების გათვალისწინებას, შეამცირებს მომავალი კონფლიქტის რისკს და შექმნის უფრო სტაბილურ და პროგნოზირებად უსაფრთხოების გარემოს“, – წერს კუშნერი.
კუშნერის თქმით, ხუთ ძირითად მიზანს ისახავენ: მუდმივ კონსულტაციებს უსაფრთხოების საკითხებზე, სანდო კრიზისულ კომუნიკაციებს, გაზრდილ სამხედრო გამჭვირვალობას, ესკალაციის რისკების შესამცირებელ ზომებს და გრძელვადიანი ევროპული უსაფრთხოებისა და სტაბილურობის მყარ ჩარჩოს.
„ნებისმიერმა შეთანხმებამ სრულად უნდა სცეს პატივი თითოეული ერის სუვერენიტეტს, ტერიტორიულ მთლიანობასა და დამოუკიდებელი გადაწყვეტილების მიღების პროცესს. თითოეულ ქვეყანას შეუნარჩუნდება საკუთარ უსაფრთხოებასა და ალიანსებზე გადაწყვეტილების მიღების უფლება და არცერთ ქვეყანას არ ექნება ვეტოს უფლება სხვის სუვერენულ არჩევანზე. ნატო დარჩება ევროპული კოლექტიური თავდაცვის ცენტრში და ეს ინიციატივა დაეფუძნება არსებულ ინსტიტუციებსა და ვალდებულებებს.
ჩვენ გავაგრძელებთ კონსულტაციებს Shell Bay-ს ფორმატით უკრაინასთან, ნატოსთან, ევროკავშირთან და ჩვენს ევროპელ პარტნიორებთან ერთად და გავაფართოებთ ჩართულობას, რათა უზრუნველყოფილ იქნას ყველა შესაბამისი პერსპექტივისა და იდეის გათვალისწინება. ჩვენ ასევე ჩავრთავთ რუსეთს სამშვიდობო მოლაპარაკებების ფარგლებში“, – წერს კუშნერი.
მისი თქმით, მომავალ კვირას აბუ-დაბიში შეერთებული შტატები, თებერვლის შემდეგ, პირველ სამმხრივ სამშვიდობო დისკუსიას გამართავს უკრაინასთან და რუსეთთან.
„ყველა მხარე კვლავინდებურად ინტენსიურად ემზადება არსებითი და პროდუქტიული მოლაპარაკებებისთვის. ჩვენ მჭიდროდ ვიმსჯელებთ ჩვენს ევროპელ პარტნიორებთან და პროგრესის მიღწევის შემთხვევაში, მიზნად დავისახავთ უფრო ფართო მრავალმხრივ ფორმატზე გადასვლას მათი პირდაპირი მონაწილეობით.
ეს იდეები კვლავ ვითარდება და ჩვენ მივესალმებით გააზრებულ მოსაზრებებს. სწორი სტრუქტურის შექმნა გადამწყვეტი იქნება ამ ომის დასასრულებლად და კონფლიქტიდან იმ პირობებზე გადასასვლელად, რომლებიც შესაძლებელს გახდის მყარ მშვიდობას.
ეს რთული და დეტალური სამუშაოა. მარტივი გამოსავალი არ არსებობს, მაგრამ შესაძლებლობა, ხელი შევუწყოთ ამ დამანგრეველი ომის დასრულებას და ავაშენოთ უფრო მშვიდი, უსაფრთხო და აყვავებული ევროპის საფუძველი მომავალი თაობებისთვის, ამ გამოწვევას ნამდვილად აქცევს ღირსეულ საქმედ.
ჩვენ ვნახავთ, როგორ განვითარდება ეს დისკუსიები და გავაგრძელებთ ინტენსიურ მუშაობას ყველა მხარესთან ერთად პრეზიდენტ ტრამპის მიზნისკენ — ყოვლისმომცველი და ხანგრძლივი მშვიდობის მისაღწევად“, – წერს კუშნერი.
