ჩვენი ნებისმიერი ქმედება წინააღმდეგობაა სამართლებრივი სახელმწიფოს შესანარჩუნებლად - "დაფიონის" დამფუძნებელი ზვიად ცეცხლაძე

ცეცხლაძეს პროკურატურა საპროტესტო აქციებზე ჯგუფური ძალადობის ორგანიზებასა და ხელმძღვანელობას ედავება.

მან, ასევე მადლობა გადაუხადა მხარდამჭერებს და მოუწოდა, რომ "ბრძოლას ყოველთვის აქვს აზრი".

"ახალგაზრდები, რომლებიც აქციებზე ცეკვავდნენ, მღეროდნენ და თამაშობდნენ, უცებ ფიქრობენ, რომ გამოიყენონ პიროტექნიკა, ფიქრობენ, რომ აუცილებელია, შეეწინააღმდეგონ პოლიციას. მსურს რომ ამაზე დაფიქრდეთ, საზოგადოება რატომ მივიდა აქამდე, რა ალტერნატივა დაუტოვა სახელმწიფომ? რა ალტერნატივა დაუტოვა, მათ შორის სასამართლომ ახალგაზრდებს, რომლებიც იბრძვიან სამშობლოსთვის.

ჩემი პოზიცია არის შემდეგი, საქართველოში დემოკრატია დასრულდა, სამართლებრივი რეჟიმი, ყველაფერი გათელილია და საზოგადოებას, მათ შორის, მეც გვრჩება ერთადერთი, საერთაშორისო სამართლის გამოყენება და წინააღმდეგობის გაწევის უფლება. შესაბამისად, ჩვენი ნებისმიერი ქმედება არის წინააღმდეგობა იმისთვის, რომ შენარჩუნდეს სამართლებრივი სახელმწიფო, დაცული იყოს აბსოლუტურად ყველა ადამინის უფლება", - თქვა მან.

ზვიად ცეცხლაძეს და კიდევ შვიდ დაკავებულს აღკვეთის ღონისძიებად პატიმრობა შეუფარდა. გადაწყვეტილება, ცოტა ხნის წინ, მოსამართლე ირაკლი ხუსკივაძემ გამოაცხადა.

მოსამართლის თქმით, მან დასაბუთებული ვარაუდის სტანდარტით მიიჩნია, რომ ჩადენილია ჯგუფური ძალადობა, ორგანიზება და მასში მონაწილეობა.

• სამ დაკავებულსექვსიდან ცხრა წლამდე პატიმრობა ემუქრება - მათ ჯგუფური ძალადობის ორგანიზებასა და ხელმძღვანელობას ედავებიან;
• ხუთ დაკავებულს ოთხიდან ექვს წლამდე პატიმრობა ემუქრება - მათ ჯგუფურ ძალადობაში მონაწილეობას ედავებიან.

თბილისში მიმდინარე აქციებში მონაწილეთა შორის 26 ადამიანი სისხლის სამართლის კოდექსით არის დაკავებული.