ცხინვალი თბილისისგან ჯაშუშობაში ბრალდებულის მდგომარეობაზე ინფორმაციას ითხოვს

“სამხრეთ ოსეთის ხელისუფლება კვლავ ცდილობს, მიიღოს ინფორმაცია საქართველოს სპეცსამსახურების მიერ ჯაშუშობის ბრალდებით დაკავებული სამხრეთ ოსეთის სახელმწიფო უნივერსიტეტის სტუდენტის, თამაზ გოლოევის ჯანმრთელობის მდგომარეობისა და ბედის შესახებ”, – ამის შესახებ დე ფაქტო სამხრეთ ოსეთის დელეგაციის ხელმძღვანელმა ეგორ კოჩიევმა ინციდენტების პრევენციისა და მათზე რეაგირების მექანიზმის (IPRM) 135-ე შეხვედრის შედეგების შეჯამებისას განაცხადა.

ცხინვალი ითხოვს, თბილისში ჯაშუშობაში ბრალდებული გოლოევი “წითელმა ჯვარმა” მოინახულოს

„ამ ეტაპზე კონკრეტულ პასუხებს არ გვაძლევენ. მხოლოდ იმას გვატყობინებენ, რომ სასამართლო სხდომები მიმდინარეობს, თუმცა ამ სხდომების შედეგები ჩვენთვის უცნობია“, – თქვა კოჩიევმა.

მისი თქმით, ქართული მხარე ამტკიცებს, რომ გოლოევის ჯანმრთელობის მდგომარეობა დამაკმაყოფილებელია.

„ქართული მხარის განცხადებები გოლოევის ჯანმრთელობის კარგი მდგომარეობის შესახებ ნდობას არ იწვევს“, – თქვა დე ფაქტო სამხრეთ ოსეთის დელეგაციის ხელმძღვანელმა.

კოჩიევმა იმედი გამოთქვა, რომ უახლოეს მომავალში გოლოევის მონახულებას წითელი ჯვრის საერთაშორისო კომიტეტის წარმომადგენლები შეძლებენ.