გამწარებულ დედებზე საშიში არავინაა, მშობლები ვიწყებთ შეუპოვარ ბრძოლას – ანდრო ჭიჭინაძის დედა

მსახიობ ანდრო ჭიჭინაძის დედა, ლიკა გუნცაძე აცხადებს, რომ პროევროპულ აქციებზე დაკავებული ახალგაზრდების მშობლებზე ფსიქოლოგიური ზეწოლა მიმდინარეობს, თუმცა, ის ამბობს რომ მშობლებს არ ეშინიათ და შეუპოვრად იბრძოლებენ საკუთარი შვილების თავისუფლებისთვის.

პროევროპული აქციების ათობით მონაწილის სისხლისსამართლებრივ დევნას გუნცაძე 1937 წლის საბჭოთა რეპრესიებს ადარებს.

“ეს არის ფსიქოლოგიური ზეწოლა – მე ასე ვიღებ ამას. ფსიქოლოგიური ზეწოლა ჩემზე, მშობლებზე. ფიქრობენ, რომ ამით გავტყდებით და შიგნით, ალბათ, პატიმრებზეც ძალიან ცუდად მოქმედებს, მაგრამ ერთ რამეს ვერ ითვალისწინებენ: არ გავტყდებით, არ გვეშინია. იმიტომ, რომ ჩემი შვილი და ის ბიჭები, რომლებიც იქ სხედან, იქ უფრო თავისუფლები არიან […]

დაიჭირეს საუკეთესო ბიჭები, რომლებიც, როგორც 1937 წელს იყო – იჭერდნენ ყველაზე კარგებს, ყველაზე ჭკვიანებს. მე არ მაქვს ჩემს შვილზე [საუბარი], თუმცა ჩემი შვილიც ძალიან მომწონს და მიყვარს, მაგრამ ეს ნათელია: დევნა მიდის ჭკუაზე, პატრიოტიზმზე. ეს არის ბოლშევიკური მეთოდი. ჩვეულებრივი ამბავია ეგ, უბრალოდ ჩვენ ვერ გამოვედით აქედან […] მეც და ყველას მშობელი ვიწყებთ შეუპოვარ ბრძოლას. ძალიან დიდი ძალა მაქვს მაგისი და აუცილებლად ასე მოვიქცევი […] გონს მოეგეთ! გონს მოეგეთ! გამწარებულ დედებზე უარესი და საშიში, არავინ არ არის”, – განაცხადა ლიკა გუნცაძემ “ფორმულას” ეთერში.

მსახიობი ანდრო ჭიჭინაძე 5 დეკემბერს დააკავეს. მას ბრალდება წარდგენილი აქვს სისხლის სამართლის კოდექსის 25-ე მუხლის მე-2 ნაწილით გათვალისწინებული დანაშაულის ჩადენაში, რაც ჯგუფურ ძალადობაში მონაწილეობას გულისხმობს. ბრალის დამტკიცების შემთხვევაში მას 4-დან 6 წლამდე თავისუფლების აღკვეთა ემუქრება.

ჭიჭინაძის საქმესთან ერთად განიხილება კიდევ 5 ადამიანის საქმე – ონისე ცხადაძე, რუსლან ცივაკოვი, ჯანო არჩაია, ლუკა ჯაბუა, გურამ მირცხულავა. ყველა მათგანს ჯგუფურ დანაშალში მონაწილეობა ედება ბრალად.

იგივე საქმის ფარგლებში დაკავებულია კიდევ 8 ადამიანი. მათგან სამს – ვეფხვია კასრაძეს, ვასილ კაძელაშვლსა და ზვიად ცეცხლაძეს ძალადობის ორგანიზება და/ან ხელმძღვანელობა ედება ბრალად, დანარჩენი 5-ს – 18 წლის საბა ჯიქიას, 20 წლის გიორგი გორგაძეს, 19 წლის ირაკლი მიმინოშვილის, 20 წლის ნიკოლოზ ჯავახიშვილსა და 24 წლის თორნიკე გოშაძეს ამ ძალადობაში მონაწილეობა.

ამავე თემაზე:

• რატომ ითხოვს პროკურატურა ანდრო ჭიჭინაძის და სხვების საქმის გადადებას