netgazeti 
ირანის ისლამური რესპუბლიკის ვიცე-პრეზიდენტის განცხადებით, აზერბაიჯანელ სტუდენტ ქალებს, რომლებსაც ჰიჯაბის ტარების გამო შეზღუდვები ექმნებათ, შეუძლიათ სწავლა ირანში გააგრძელონ. ამის შესახებ სააგენტო Mehr-ი წერს და პოლიტიკოსის სოციალურ ქსელ X-ში გამოქვეყნებულ განცხადებას ეყრდნობა.
აზერბაიჯანში, მორწმუნეთა პროტესტის მიუხედავად, კვლავ მოქმედებს შეზღუდვები, რომლებიც სკოლებში ჰიჯაბით მოსწავლეებისა და პედაგოგების დაშვებას კრძალავს. დასახლება ნარდარანში აქციის მონაწილეთა მასობრივი დაკავების შემდეგ მშობლები საჯაროდ აკრძალვის წინააღმდეგ გამოსვლას ერიდებიან, ზოგი კი გოგონებს სკოლაში აღარ უშვებს.
12 ოქტომბრიდან აზერბაიჯანის სკოლების ხელმძღვანელები გაკვეთილებზე არ უშვებენ იმ პედაგოგებსა და მოსწავლეებს, რომლებმაც ჰიჯაბის მოხსნაზე უარი თქვეს. ბაქოს რამდენიმე სკოლის მიმდებარედ მოსწავლეებმა და მასწავლებლებმა პროტესტის ნიშნად გაკვეთილები ქუჩაში ჩაატარეს.
13 ოქტომბერს აზერბაიჯანის შინაგან საქმეთა სამინისტრომ განაცხადა, რომ საპროტესტო აქციების 37 მონაწილე დააკავეს, აქტივისტების მონაცემებით კი დაკავებულთა რაოდენობამ 200-ს გადააჭარბა.
არეფმა მადლობა გადაუხადა ირანის მეცნიერების სამინისტროს განცხადებისთვის, რომელშიც სამინისტრომ გამოთქვა მზადყოფნა, მიიღოს ჰიჯაბიანი აზერბაიჯანელი გოგონები ირანის უმაღლეს სასწავლებლებში. მან ასევე მოუწოდა განათლების სფეროს სხვა წარმომადგენლებსა და უნივერსიტეტების ხელმძღვანელებს, გადადგან ნაბიჯები, რათა ამ სტუდენტებმა სწავლის გაგრძელება შეძლონ.
მანამდე თეირანის უნივერსიტეტთან არსებული სტუდენტური ორგანიზაცია „ბასიჯი“ ამ შეზღუდვების წინააღმდეგ გამოვიდა და აზერბაიჯანის რესპუბლიკის საელჩოს შენობასთან საპროტესტო ბანერი გამოფინა, ნათქვამია პუბლიკაციაში.
