ირანში დაკავებული იტალიელი ჟურნალისტი შინ დაბრუნდა

სამი კვირის განმავლობაში ირანში დაკავებული იტალიელი ჟურნალისტი გაათავისუფლეს და ის შინ დაბრუნდა მას შემდეგ, რაც მისი საქმე დაუკავშირდა ირანელი ინჟინრის, რომელსაც შეერთებული შტატები ეძებს და იტალიაში დააპატიმრეს.

29 წლის სესილია სალა რომის ჩიამპინო აეროპორტში დაეშვა, სადაც მას ოჯახის წევრებთან ერთად პრემიერი ჯიორჯია მელონიც დახვდა.

სალას გათავისუფლება დიდი დიპლომატიური და პოლიტიკური გამარჯვება გახდა მელონისთვის. მელონის ბოლოდროინდელმა სტუმრობამ არჩეულ პრეზიდენტ დონალდ ტრამპთან, დიდად გააძლიერა მისი პოზიციები საერთაშორისო არენაზე იმ დროს, როდესაც იტალია სალას გასათავისუფლებლად მოლაპარაკებებს აწარმოებდა.

სალას გათავისუფლების შესახებ განცხადების გაკეთებისას, მელონის ოფისმა თქვა, რომ პრემიერმა ამის შესახებ სალას მშობლებს პირადად შეატყობინა და ამ საქმეში მთავრობის „დიპლომატიური და სადაზვერვო არხებით ინტენსიური მუშაობის“ როლი აღნიშნა.

იტალიის თავდაცვის მინისტრმა გვიდო ქროზეტომ თქვა, რომ ტრამპთან ვიზიტმა პრემიერის საერთაშორისო ავტორიტეტზე დიდი გავლენა მოახდინა, რამაც მოლაპარაკებებში იტალიის პოზიცია გააძლიერა.

ირანულმა მედიამ ჟურნალისტის გათავისუფლება აღიარა და მხოლოდ უცხოური მედიის ციტირება მოახდინა. ირანის ოფიციალურ პირებს კომენტარი არ გაუკეთებიათ.

„ფოლიო დეილის“ ჟურნალისტი სალა თეირანში 19 დეკემბერს, ქვეყანაში ჟურნალისტის ვიზით შესვლიდან 1 კვირაში დააკავეს. ახალი ამბების ოფიციალური სააგენტო „ირნას“ თანახმად, მას ბრალად ისლამური რესპუბლიკის კანონების დარღვევა დასდეს.

იტალიელი კომენტატორები გამოთქვამდნენ ვარაუდს, რომ სალა დააკავეს, რათა იტალიაში დაკავებულ მოჰამად აბედინის გათავისუფლების უზრუნველსაყოფ მოლაპარაკებებში კოზირად გამოეყენებინათ. იტალიის ხელისუფლებამ აბედინი ამერიკული ორდერის საფუძველზე სამი დღით ადრე, 16 დეკემბერს მილანის აეროპორტში დააკავა.

აშშ-ის იუსტიციის დეპარტამენტი აბედინს და სხვა ირანელს ბრალს სდებს ირანისთვის დრონის ტექნოლოგიის გადაცემაში, რომელიც 2024 წლის იანვარში იორდანიაში, ამერიკულ სამხედრო ობიექტზე თავდასხმისთვის გამოიყენეს, სადაც სამი ამერიკელი სამხედრო დაიღუპა.