CNN: ვაშინგტონში ჩადის რუსი მაღალჩინოსანი, რომელსაც სანქციები დროებით მოუხსნეს

ამ კვირაში ვაშინგტონში ჩავა რუსეთის პირდაპირი ინვესტიციების ფონდის ხელმძღვანელი კირილ დმიტრიევი, რომელიც აშშ-ის პრეზიდენტის სპეციალურ წარმომადგენელ სტივ უიტკოფს შეხვდება. ამის შესახებ CNN-ი იუწყება ინფორმირებულ წყაროებზე დაყრდნობით.

დმიტრიევი, რომელიც უცხოეთის ქვეყნებთან საინვესტიციო-ეკონომიკური თანამშრომლობის საკითხებში პრეზიდენტ პუტინის სპეციალური წარმომადგენელიცაა, უკრაინაში რუსეთის არმიის ფართომასშტაბიანი შეჭრის გამო აშშ-ის მიერ სანქცირებულ რუს მაღალჩინოსნებს შორისაა. ამ პირებს აკრძალული აქვთ აშშ-ის ტერიტორიაზე შესვლაც.

CNN-ის წყაროთა თანახმად, იმისთვის, რომ დმიტრიევმა ვაშინგტონში ჩასვლა შეძლოს, შეერთებულმა შტატებმა დროებით შეაჩერა მის წინააღმდეგ სანქციების მოქმედება.

ამერიკული ტელეკომპანიის წყაროთა ცნობით, პუტინის სპეციალური წარმომადგენელი ვაშინგტონში მიემგზავრება „ურთიერთობების გასამყარებლად ორ ქვეყანას შორის, რომლებიც მიისწრაფიან უკრაინაში ომის დასრულებისკენ“.

კირილ დმიტრიევი პირველი რუსი მაღალჩინოსანია, რომელიც უკრაინაში ომის დაწყების შემდეგ ვაშინგტონს ვიზიტით ეწვევა.

ის მონაწილეობდა რუსეთისა და აშშ-ის დელეგაციების შეხვედრაში, რომელიც თებერვალში საუდის არაბეთში გაიმართა.

დმიტრიევი ჩართული იყო ნარკოდანაშაულის ბრალდებით რუსეთში 2021 წლის ზაფხულში დაკავებული ამერიკელი მასწავლებლის, მარკ ფოგელის გათავისუფლების პროცესში. ფოგელი, რომელსაც 14-წლიანი პატიმრობა ჰქონდა მისჯილი, 2025 წლის თებერვალში გაათავისუფლეს.