#OK! „არავის ვუყვარვარ მასზე მეტად“ – მეგან მარკლმა Harper’s Bazaar-თან ჰარიზე ისაუბრა

სასექსის ჰერცოგისა და ჰერცოგინიას ცხოვრება ყოველთვის სკანდალებითა და გამოწვევებით იყო სავსე, ამიტომ „მეამბოხე წყვილი“ ჟურნალისტების მუდმივი სამიზნეა. ამჯერად, მეგან მარკლმა საკუთარ ცხოვრების, შვილებისა და პრინცი ჰარის შესახებ ჟურნალ Harper’s Bazaar-თან ვრცელი ინტერვიუში ისაუბრა.

მარკლი ჟურნალის გარეკანზე 2022 წლის შემდეგ პირველად გამოჩნდა. ამჯერად, ის Harper’s Bazaar-ის დეკემბერ – იანვრის ნომრისთვის პოზირებდა.

ახალ ფოტოებზე ჰერცოგინია პარიზის მოდის კვირეულის უახლესი ჩვენებების სამოსშია გამოწყობილი. განსაკუთრებულ ყურადღებას იქცევს  Dior-ის შავი ჟაკეტი ღრმა დეკოლტეთი და დიდი ბაფთით  (დიზაინერი ჯონათან ანდერსონი) და Balenciaga-ს წითელი ასიმეტრიული კაბა (დიზაინერი პიერპაოლო პიჩოლი).

მეგანის სამკაულებს შორის, თვალში გვხვდება მისი საყვარელი Cartier Love-ის სამაჯურები, რომლებსაც ჰერცოგინია, როგორც ჩანს, იშვიათად იხსნის.

მეგან მარკლის ჩაცმულობის სისადავეს განსაკუთრებით ხაზს უსვამს „მაკიაჟი მაკიაჟის გარეშე“ და უკან შეკრული თმა. მსგავსი ლუქით ჰერცოგინია გასულ თვეს Project Healthy Minds-ის ფსიქიკური ჯანმრთელობის ფესტივალზე და Balenciaga-ს პარიზულ ჩვენებაზე გამოჩნდა.

მეგანმა ვრცელ ინტერვიუში თავის ბიზნესზე, ბავშვობაზე, ამჟამინდელ ცხოვრებაზე და რა თქმა უნდა, პრინც ჰარისთან ურთიერთობაზე ისაუბრა.

„მას ისე თამამად და ძლიერად ვუყვარვარ, ისეთი განსხვავებული ხედვა აქვს და ისე ხედავს, როგორც მე ვერასოდეს დავინახავდი. მსოფლიოში არავის ვუყვარვარ მასზე მეტად, ამიტომ ვიცი, რომ ის ყოველთვის ჩემი მხარდამჭერი იქნება“, – აღნიშნა მან.

მეგანის თქმით, მისთვის ჰარის მიმზიდველობის საიდუმლო ისაა,  რომ ყველაფრის მიუხედავად, ბავშვური სიხარული და აღფრთოვანება შეუძლია.

„ეს წარმოუდგენლად მიზიდავდა და მან შეძლო, რომ  ეს თვისება ჩემშიც გაეღვიძებინა. ეს ჩვენი ცხოვრების ყველა ასპექტში ვლინდება, მუშაობაშიც კი. მინდა, რომ ვითამაშოთ, გავერთოთ, ვისწავლოთ, შევქმნა“, – აღნიშნა მეგანმა.

ჰერცოგინიამ აღიარა, რომ სახლიდან მუშაობა მოსწონს და მისთვის შვილების, არჩისა და ლილიბეთის გვერდით ყოფნა ძალიან მნიშვნელოვანია.

„ჩემი ოთახი სამზარეულოს გვედით მდებარეობს. ეს ისეთი მოსახერხებელია“.

მეგანმა აღნიშნა, რომ ისწავლა სამუშაოსა და პირად ცხოვრებას შორის წონასწორობის დაცვა – ბოლო დროს ის და ჰარი სულ უფრო ხშირად ჩნდებიან ისეთ საჯარო ღონისძიებებზე, როგორიცაა პარიზის მოდის კვირეული და ჰოლივუდის გალა-წვეულებები.

ჰერცოგინიას არც იმის თქმა დავიწყებია, თუ როგორ გაუმკლავდა პოპულარობის ზრდას. შეგახსენებთ, რომ პრინც ჰარისთან ნიშნობისა და 2018 წელს ქორწინების შემდეგ მეგანი მსოფლიოს ყურადღების ცენტრში მოექცა. ამის შემდეგ მოხდა მოვლენები, რომლებსაც მედიაში „მეგსიტს“ უწოდებდნენ – 2020 წელს სასექსის ჰერცოგმა და ჰერცოგინიამ სამეფო მოვალეობებზე უარი თქვეს და დიდი ბრიტანეთი დატოვეს. უინძორების შესახებ სკანდალური ინტერვიუების, პრინცის მემუარების და Netflix-ის სერიალების გამოსვლის შემდეგ, წყვილის მიმართ ყურადღება გაიზარდა. მეგანმა ირონიულად აღნიშნა, რომ სამეფო ოჯახში ცხოვრების დროს საკუთარი საზღვრების დაცვა ისწავლა.

„ვფიქრობ, საზოგადოების ყურადღების  შემდეგ ჩემი საზღვრები უფრო ძლიერი გახდა. შენ პოულობ სხვადასხვა გზას თავის დასაცავად – იქნება ეს თვითგადარჩენა თუ უბრალოდ, გაზრდა“- განაცხადა მან.

მარკლი ამბობს, რომ ის ყოველთვის ცდილობს აუხსნას შვილებს, რომ ისინი სრულყოფილებისკენ არ უნდა ისწრაფოდნენ.

„მსოფლიოში არაფერია იდეალური. მე, როგორც ყველა, შეცდომებს ვუშვებ. სრულყოფილებისკენ სწრაფვა კი სახალისო სულაც არ არის. მაშ, რატომ უნდა გააკეთო ეს, თუ უბრალოდ გართობა გინდა?“

მეგანმა ასევე ისაუბრა პარიზის მოდის კვირეულის ფარგლებში Balenciaga-ს ჩვენებაზე გამოჩენის შესახებ. იმ დროს ყველა ვარაუდობდა, რომ ჰერცოგინიამ ჩვენებაზე მიწვევა ითხოვა, რაც თავად დაადასტურა. მეგანის თქმით, გადაწყვიტა, რომ ბრენდის ახალი კრეატიული დირექტორის, პიერპაოლო პიჩოლის დებიუტისთვის, რომელსაც დიდი ხანია იცნობს, მხარი დაეჭირა.

„მე დავუკავშირდი და ვუთხარი – სიამოვნებით მოვიდოდი და მხარს დაგიჭერდი“. ჩვენ ეს საიდუმლოდ შევინახეთ, რაც ძალიან სახალისო იყო“.

ახლახან, Netflix-მა მეგან მარკლის სადღესასწაულო სერიალის ანონსი გამოაქვეყნა, სადაც სასექსის ჰერცოგინია თავის მურაბას წარადგენს და  პრინც ჰარის კოცნის.

„მიყვარს სადღესასწაულო სეზონი. მთავარია, დრო გამონახოთ საყვარელ ადამიანებთან ურთიერთობისთვის. ტრადიციების შენარჩუნება და ახლის შექმნა. ვნახოთ, გამოვა თუ არა“ – ამბობს ის.

ასევე დაგაინტერესებთ

#OK! მეგან მარკლი Balenciaga-ს ახალი მუზა