#OK! მატილდა გვარლიანი და Victoria’s Secret-ის ლეგენდარული ანგელოზები

Victoria’s Secret-ის 2025 წლის ჩვენება განსაკუთრებული არა მხოლოდ პოდიუმზე ლეგენდების დაბრუნებით, არამედ ახალი სახეებითაც იყო, რომლებიც თანამედროვე მოდის ტენდენციებს ქმნიან. მათ შორის იყო მატილდა გვარლიანი – პირველი ქართველი მოდელი, რომელიც 2024 წელს Victoria’s Secret-ის პოდიუმზე პირველად გამოჩნდა. 2025 წლის შოუზე ქართველმა ტოპ მოდელმა ორი ლუქი მოირგო და ორივე ძირითად ხაზში. პირველად მატილდამ ქალის ვარდისფერი თეთრეული წარადგინა, მეორედ კი ცისფერი, მბზინავი სამოსი.

Victoria’s Secret 2025-ის შოუ ორსულმა ჯასმინ ტუქსმა გახსნა, რომელმაც თავისი „ფრთები“ 2015 წელს მიიღო. ახლა ის მეორე შვილს ელოდება, თუმცა ამას ხელი არ შეუშლია, რომ პოდიუმზე ელეგანტურად გაევლო. წელს ჯასმინს განსაკუთრებული როლი ერგო – ის Victoria’s Secret-ის ისტორიაში მეორე ფერადკანიანი მოდელია, რომელსაც შოუს გახსნის პატივი ერგო. პირველად ეს 90-იანებში ნაომი კემპბელმა გააკეთა.

შოუს პირველივე წუთებში პოდიუმზე ადრიანა ლიმა გამოჩნდა. 2018 წელს მან მოდელის კარიერის დასრულების შესახებ გამოაცხადა, თუმცა შარშან შემოდგომაზე პოდიუმზე მოულოდნელად დაბრუნდა და Schiaparelli-ს შოუში მონაწილეობა მიიღო. როგორც ჩანს, ადრიანა პოდიუმზე კიდევ დიდხანს დარჩება, მით უმეტეს, რომ დღესაც ისეთივე მშვენიერია, როგორც 15 წლის წინ.

ადრიანას შემდეგ პოდიუმზე არანაკლებ ცნობილი „ანგელოზი“ – ალესანდრა ამბროსიო გამოჩნდა. ლიმას მსგავსად, მასაც  ფრთები ამშვენებდა, თუმცა მისგან განსხვავებით, ალესანდრას მოდელობა არ შეუწყვიტა და წელს ის Balenciaga-ს ჩვენებაშიც მონაწილეობდა.

ბრენდის „ძველი გვარდიიდან“ დაუცენ კრუსის გამოჩენა განსაკუთრებულ აღნიშვნას იმსახურებდა. ბოლოს ის Victoria’s Secret-ის შოუზე 2014 წელს გამოვიდა და ათი წლის შემდეგ, 2025 წლის შოუს აღორძინების პერიოდში კვლავ პოდიუმს დაუბრუნდა.

ვერც ქენდის სვეინპოლს დავივიწყებთ. 2020 წელს მან გამოაცხადა, რომ ბრენდთან თანამშრომლობას წყვეტდა, მაგრამ ხუთი წლის შემდეგ, ისევ შოუზე დაბრუნდა, რომ კიდევ ერთხელ დაემტკიცებინა, რომ Victoria’s Secret-ის ისტორიაში ერთ-ერთი ყველაზე ბრწყინვალე „ანგელოზია“.

მათ გარდა, შოუში მონაწილეობდნენ ირინა შეიკი, ბელა და ჯიჯი ჰადიდები, ლილა მოსი, ბარბარა პალვინი, ემილი რატაკოვსკი (პირველად), ეშლი გრეჰემი, ანოკ იაი, ამელია გრეი და მრავალი სხვა.

შეგახსენებთ, რომ Victoria’s Secret-ის შოუ ყოველწლიური,  მოდის შოუა, რომელსაც საცვლების მწარმოებელი კომპანია Victoria’s Secret მასპინძლობს. სპეციალურად შოუსათვის შექმნილ კოსტიუმებს პოდიუმზე რჩეული მოდელები – “ანგელოზები” წარადგენენ. Victoria’s Secret-ის ბოლო ჩვენება „დიდი შესვენების“ წინ 2018 წელს გაიმართა, 2019 წელს კი ცნობილი გახდა, რომ შოუმ საკუთარი შესაძლებლობები ამოწურა და აღარ გაიმართება.
თითქმის ექვსწლიანი პაუზის განმავლობაში ბრენდმა რამდენიმე ხმაურიანი სკანდალი და ფილიალების გაკოტრება გადაიტანა და 2024 წელს გრანდიოზული ჩვენებით დაბრუნდა.

ასევე დაგაინტერესებთ

#OK! მატილდა გვარლიანი მსოფლიოში ყველაზე მაღალანაზღაურებადი მოდელების სიაშია