#OK! მოდის ციფრული რევოლუცია – H&M კამპანიებში AI-ის მიერ შექმნილი მოდელების “ციფრულ ტყუპებს” გამოიყენებს

H&M აქტიურად  მუშაობს იმაზე, რომ AI-ის დახმარებით 30 მოდელის “ციფრული ტყუპი” შექმნას, რომლებსაც მოდელების ნებართვის საფუძველზე  გამოიყენებს მარკეტინგულ კამპანიებსა და სოციალურ მედიაში. ხელოვნური ინტელექტის მიერ გენერირებულ 30 მოდელთაგან ერთ-ერთი ქართველი მოდელის,  მატილდა გვარლიანის “ციფრული ტყუპი” იქნება.

აღნიშნული ინფორმაციის გავრცელებისთანავე შვედური ბრენდი კრიტიკის ქარცეცხლში გაეხვა. მსოფლიო მედიაში აქტიურად დაიწყეს საუბარი იმ საფრთხეებზე, რომლებიც ამ ფაქტს შეიძლება ახლდეს თან.   კრიტიკოსები შეშფოთებას გამოთქვამენ იმაზე, რომ შესაძლოა კონტრაქტები შეუმცირდეთ როგორც მოდელებსა და ფოტოგრაფებს, ისე თმის სტილისტებს და ვიზაჟისტებს – ადამიანებს, რომლებიც ფოტოსესიების ორგანიზებაში მნიშვნელოვან როლს ასრულებენ.

H&M-ის წარმომადგენლის, ჰაკან ანდერსონის თქმით, კომპანია ჯერ პროექტის კვლევის ეტაპზე იმყოფება:

„ჩვენ უბრალოდ ვიკვლევთ, რა არის შესაძლებელი,  ამას ვაკეთებთ ინდუსტრიის სხვა კრეატიულ სააგენტოებთან და თავად მოდელებთან მჭიდრო თანამშრომლობით . მათ აქვთ შესაძლებლობა  სრულად აკონტროლონ, თუ როდის იქნება გამოყენებული   თავიანთი ‘ციფრული ტყუპი’  და,  რა თქმა უნდა, მიიღებენ ანაზღაურებას მისი გამოყენებისთვის“ — განაცხადა მან.

H&M-ის მთავარი კრეატიული ოფიცრის, იორგენ ანდერსონი აღნიშნავს, რომ  კომპანია „ადამიანზე ორიენტირებულ მიდგომას“ შეინარჩუნებს ახალი ტექნოლოგიის დანერგვისას:

„H&M დაინტერესებულია  აღმოაჩინოს  ის  საშუალებები, თუ როგორ წარმადგინოს  მოდა ახალი, კრეატიული გზებით  და , ამავდროულად,  ახალი ტექნოლოგიებისგან მიიღოს სარგებელი, თუმცა, ამავდროულად ვრჩებით ერთგულები ჩვენი ინდივიდუალური სტილის მიმართ”. 

ბრენდის წარმომადგენლები ამბობენ  იმასაც, რომ AI-ის მიერ გენერირებულ თითოეულ ფოტოს თან ექნება კონკრეტული ნიშანი, რომლის საშუალებითაც მარტივი გახდება მისი ამოცნობა. ამასთანავე, საზოგადოებისგან წამოსული კრიტიკას შემდეგ, H&M-ის გუნდმა აღნიშნა ისიც, რომ ისინი არ აპირებენ სრულად გააუქმონ  ცოცხალი ფოტოსესიები მოდელებთან.

სენატორი ბრედ ჰოილმენ-სიგალი, რომელიც კანონპროექტის ერთ-ერთი ავტორია, აცხადებს, რომ „ეს შრომის კანონი დაიცავს მოდელებს ფინანსური ექსპლუატაციისგან და იმისგან, რომ მათი გამოსახულებები მათი ნებართვის გარეშე არ იქნას გამოყენებული.“

აქტიურად საუბრობენ იმაზეც, რომ ხელოვნური ინტელექტის  გამოყენებას მოდის ინდუსტრიაში უარყოფითთან ერთად დადებითი შედეგებიც შეიძლება ჰქონდეს. როგორც აღნიშნავენ, AI-ის ჩართვა მოდის სფეროში  მოდელებს ხელს შუწყობს თავფიანთი დრო მეტად ეფექტურად გამოიყენონ- მათ ექნებათ საშუალება ონლაინ შეასრულონ თავიანთი საქმიანობა და  ქვეყნიდან ქვეყანაში ფრენას და კასტინგებზე სიარულში დრო არ დაკარგონ.

H&M არ არის ერთადერთი ბრენდი, რომელიც AI-ის აქტიურად ჩართვას აპირებს თავის საქმიანობაში, Hugo Boss-მა,   Levi’s-მა   და მსგავსმა ბრენდებმა ასევე დაიწყეს ხელოვნური ინტელექტის გამოყენება იმისათვის, რომ  თავიანთი მარკეტინგული კამპანიები მეტად მრავალფეროვანი გახდეს.

აღსანიშნავია ისიც,  რომ ნიუ-იორკში 2025 წლის ივნისში ძალაში შევა Fashion Workers Act — ახალი კანონი, რომელიც მიზნად ისახავს ხელოვნური ინტელექტის გამოყენებასთან დაკავშირებული ზოგიერთი საკითხის მოგვარებას, კერძოდ,  ის მოდელებს დამატებით დაცვას შესთავაზებს, მათ შორის უზრუნველყოფს ანაზღაურების გამჭვირვალობას და კონტროლს მათ ციფრულ ორეულებზე.