#OK! საერთო ღირებულებები და ხედვა OK! მეგობრები – kids box-ის დამფუძნებლები

რუბრიკა #OKმეგობრების სტუმრები არიან kids box-ის დამფუძნებლები – თამარ გელაშვილი და ბელა პაპუნაშვილი. გარდა ბიზნესპარტნიორობისა, გოგონები ერთმანეთის ახლო მეგობრები არიან. საერთო ხასიათის შტრიხები, ინტერესები და ნდობა აღმოჩნდა ის გადამწყვეტი მომენტი, როცა ამ ორმა ადამიანმა ბიზნესის ერთად წამოწყება გადაწყვიტა.

როდის გაიცანით ერთმანეთი?

(ბელა პაპუნაშვილი): ერთმანეთი საქართველოს ლატარიის კომპანიის გასაუბრებაზე გავიცანით. აღსანიშნავია ის ფაქტი, რომ ერთი და იმავე პოზიციაზე ვიყავით მისულები, მაგრამ ეს ხელს არ გვიშლიდა ერთმანეთის გულშემატკივრობაში. ვაკანტური ადგილი ერთი იყო, მაგრამ ორივე აგვიყვანეს, აქედან იწყება ჩვენი მეგობრობის ისტორიაც.

როგორ ფიქრობთ, რამ განაპირობა თქვენი დამეგობრება?

(თამარ გელაშვილი): ალბათ პიროვნულმა თვისებებმა, რაც თვალში საცემი იყო გასაუბრებისთანავე. შემდგომ უკვე, საერთო ინტერესებმა და შეხედულებებმა, რამაც კიდევ უფრო დაგვაახლოვა.

(ბელა პაპუნაშვილი): დავეთანხმები თამოს, პიროვნული თვისებები ძალიან მნიშვნელოვანი იყო და, ამასთანავე, დავამატებ, რომ ბევრი საერთო მხიარული თემა აღმოვაჩინეთ, რაზეც ძალიან ბევრს ვხალისობდით. სიცილი კი აახლოებს და დადებით განწყობას ქმნის ერთმანეთის მიმართ.

თვისება, რომელიც ერთმანეთში მოგწონთ?

(თამარი): ბევრი თვისება მომწონს, თუმცა განსაკუთრებით აღვნიშნავ კეთილშობილებასა და გონიერებას. ბელა შემდგარი პიროვნებაა და კარგი მეგობარი.

(ბელა): თამოში ვაფასებ მიზანსწრაფულობას, ერთგულებას, უანგარო მეგობრობას და რაც ყველაზე მნიშვნელოვანია, მისი თვისებები კიდევ უფრო ამდიდრებს ჩემს თვისებებს, ალბათ თამოც იმავეს იტყოდა ჩემზე, შესაბამისად, ორივე თვისების ნაზავი მეტად გვაძლიერებს და წინ გვწევს.

როგორ ატარებთ თავისუფალ დროს?

(თამარი): თავისუფალ დროს ხშირად ვატარებთ მეგობრებთან ერთად, გვიყვარს ერთობლივი გასვლები ქალქგარეთ და სამაგიდო თამაშები, რაც კიდევ უფრო აძლიერებს ჩვენს მეგობრულ კავშირს.

ყავა თუ ჩაი?

(თამარი): ორივეს ძალიან გვიყვარს ყავა. შეგვიძლია გემრიელი ყავისთვის შორ მანძილზეც წავიდეთ და ეს ჩვენთვის ერთგვარი რიტუალიც არის.

დილის ადამიანი ხართ თუ ღამის?

(ბელა): მეც და თამოც ღამის ადამიანები უფრო ვართ. მეტად ენერგიულები და პროდუქტიულები საღამოს საათებში ვართ.

ადგილი, სადაც თავს ყველაზე მშვიდად გრძნობთ…

(თამარი): ერთმანეთის და საერთო მეგობრების კომპანიაში ვგრძნობთ თავს ყველაზე მშვიდად და კომფორტულად. ზოგადად მეგობარი ძალიან დიდი განძია და ამას თითოეული მკაფიოდ ვგრძნობთ.

რას აფასებთ ადამიანში?

სწორ ღირებულებათა სისტემას, ჰუმანურობასა და ოპტიმიზმს.

რატომ გადაწყვიტეთ საერთო ბიზნესის წამოწყება?

(ბელა პაპუნაშვილი): გვაქვს ერთი ღირებულებები, ურთიერთნდობა და ახალი გამოწვევების საერთო ინტერესი, რამაც გადაგვაწყვეტინა საერთო საქმიანობის შექმნა.

Kids box-ი არის…

(ბელა): ჩვენი და ყველა ბავშვის სიხარული.

(თამარი): Kids Box-ი უკვე 5 წელია ბაზარზეა. ეს არის 3-დან 10 წლამდე ასაკის ბავშვებისთვის განკუთვნილი 4 სხვადასხვა ზომის სასაჩუქრე ყუთი, რომელიც 3 კომპონენტს აერთიანებს: სათამაშოები, ტკბილეული და სიურპრიზის სახის ემოცია. Kids box არის ის, რაც ყველა ბავშვს აბედნიერებს და ერთ ჩვეულებრივ დღეს განსაკუთრებულ ელფერს სძენს.

ბიზნესში მეგობრობა ხელისშემშლელია თუ პირიქით?

(თამარი): მე ვფიქრობ, რომ თუ სწორი მეგობრული კავშირია, ერთობლივი ბიზნესი ყველა შემთხვევაში გამართლებულია. ვგულისხმობ, რომ ყველა ურთიერთობაში ადამიანები უნდა გრძნობდნენ თავის წილ პასუხისმგებლობას, რაც ურთიერთგაგების წინაპირობას განაპირობებს.

ვინ ან რა არის თქვენი მთავარი მოტივატორი?

(ბელა): ჩემი მოტივატორები ის ცნობილი ადამიანები არიან, ვინც გრძელი გზა გაიარა წარმატებისკენ, შექმნა რაღაც ღირებული და მნიშვნელოვანი ადამიანებისთვის. თამოს მთავარი მოტივატორი, როგორც თვითონ აღნიშნავს, საკუთარი თავია და ყოველდღიურად ცდილობს გაიუმჯობესოს თავისი უნარები და კიდევ უფრო წინ წავიდეს. ასევე დავამატებდი, რომ ერთმანეთისთვისაც დიდი მოტივატორები ვართ, რაც გვეხმარება ერთმანეთის კიდევ მეტად წინ წაწევაში.

რას ურჩევდით ერთმანეთს?

(თამარი): ბელ, მუდამ იყავი შენი ოცნების ერთგული.

(ბელა): თამოს ვურჩევდი, რომ არ შეიცვალოს, ცხოვრების ეს ტემპი შეინარჩუნოს და მუდმივი წინსვლა გარანტირებული ექნება.

ტექსტი: სოფიო მალანია

ფოტო: ალექსეი სეროვი