#OK! ხელოვნებამდე აყვანილი სტუმარმასპინძლობა

ჯულია მგელაძეს სტუმარმასპინძლობისა და ტურიზმის სფეროში 18-წლიანი გამოცდილება აქვს. მისთვის ეს სფერო საინტერესო გამოწვევა აღმოჩნდა. 6-მდე სასტუმროს გახსნაში მონაწილეობის პარალელურად სწავლა და განვითარება არ შეუწყვეტია.

ჯულია მგელაძე: მინდა მადლობა გადავუხადო კომპანია „რადარს“. ჩვენ ერთობლივად ბევრ საინტერესო პროექტზე ვიმუშავეთ, შევქმენით საინტერესო სასტუმრო ლოკაციები და იმედი მაქვს, კიდევ ბევრ სასიკეთო საქმეს გავაკეთებთ, რათა ადგილობრივი კადრები შევინარჩუნოთ.

ვიმუშავე ბრიტანულ-ჩეხურ კომპანიაში, რომლის ფილიალის საქართველოს ბაზარზე დაარსებასა და განვითარებაში ვმონაწილეობდი. ასევე, პანდემიის პერიოდში ამერიკასა და რუსეთში დისტანციურად არომათერაპია შევისწავლე.

სულ ახლახან გაიხსნა ბუტიკური ტიპის სასტუმრო „მეფე გორგასალი“, რომელიც პანდემიის პერიოდში დავხურეთ. სასტუმროში არსებული ქართული რესტორანი „სორმონი მეიდანი“ ისევ უმასპინძლებს როგორც ადგილობრივ, ასევე საერთაშორისო სტუმრებს. მოუთმენლად ველოდები ჩვენს ტერასაზე საინტერესო ღონისძიებების დაგეგმვას და ბევრ ლამაზ, ემოციურ დღეს ვაჩუქებთ თითოეულ ვიზიტორს.

რა რჩევებს მისცემდით ქართველ მენეჯერებს?

თუ კარგად არ იცნობთ სტუმარმასპინძლობისა და ტურიზმის ინდუსტრიას და ხელს ჰკიდებთ ასეთ ბიზნესს, კადრებს იყვანთ და იმედს უცრუებთ, გაქვთ არასწორი და არაჯანსაღი მენეჯმენტი, საბოლოოდ დააზარალებთ როგორც ბიზნესს, ისე ქვეყნის იმიჯს.

შექმენით ჯანსაღი და კონკურენტუნარიანი გარემო თანამშრომლებისა და სტუმრებისთვის. მოექეცით თანამშრომელს ისე, როგორც თქვენ გსურთ მოგექცნენ. მოიშორეთ კომპლექსები, იყავით უშუალოები ყველა თანამდებობაზე. ნუ აწინაურებთ ნაცნობობით, ნუ აიყვანთ სამსახურში, მომსახურების სფეროსა თუ გაყიდვებში ახლობლობით, რადგან ეს უდიდესი დემოტივაციაა იმ თანამშრომლებისთვის, რომლებიც დიდი ხანია, წლებია გემსახურებიან და სულ აქვთ იმის იმედი, რომ თქვენ მათ დაინახავთ, დააფასებთ და დააწინაურებთ.

რა არის თქვენი მთავარი მიზანი?

ჩემს ინტერესის სფეროს დაემატა ველნესი, Anti Aging-ი და სამედიცინო ტურიზმი. დღეს ადამიანების ინტერესი მხოლოდ დასასვენებლად ან სხვა ქვეყნის კულტურის სანახავად მოგზაურობა არ არის. ძალიან ტრენდულია დასვენება გაჯანსაღებისა და გაახალგაზრდავების მიზნით. უპირველესად, უნდა განისაზღვროს ადამიანის ანამნეზი და საჭიროებები, შემდეგ დაიგეგმოს განრიგი: შეირჩეს დასვენების ადგილი, შესაბამისად, ჰიგიენური ნორმები, რეაბილიტაციისათვის გარემო პირობები და კვების რაციონი.

საქართველოს აკლია ისეთი ტიპის სასტუმროები, სადაც დახვედრიდან გაცილებამდე ადამიანის სწორ გაჯანსაღებაზე ზრუნავენ და ყველა დეტალი გათვლილია. ჩემი ოცნებაა ველნესი, ეკომეგობრული სასტუმროს შექმნა სპეციალისტებით, რეაბილიტოლოგებით, ნუტრიციოლოგებითა და ფსიქოლოგებით დაკომპლექტებული.

სამომავლო გეგმები

ვსწავლობ: სოციალური მედიის ტრენდებს, მარკეტინგულ თავისებურებებს სტუმარმასპინძლობის თუ სერვისის სფეროში. მოვა დრო, როცა მხოლოდ ამ მიზნით მომმართავენ კომპანიები. ასევე, ვმუშაობ საინტერესო წიგნზე, რომელშიც ჰოტელიერებისა და ინვესტორებისთვის მნიშვნელოვანი მესიჯები იქნება გაზიარებული.

ტექსტი: სოფიო მალანია

ფოტო: ალექსეი სეროვი