World Press Photo-მა უპასუხა ქართველი ფოტოგრაფების კრიტიკას

„ჩვენ შევეცდებით გავაუმჯობესოთ ჩვენი წესები და პროცედურები სახელმწიფო კონტროლირებად სააგენტოებში მომუშავე ფოტოგრაფებთან დაკავშირებით. ჩვენ კონსულტაციას გავივლით იმ ფოტოგრაფებთან, რომლებიც მუშაობენ ისეთ ადგილებში, როგორიცაა საქართველო და უკრაინა“, - წერია განცხადებაში.

მასში აღნიშნულია, რომ გასათვალისწინებელი იყო კონტექსტი - 2008 წლის აგვისტოში რუსეთის მიერ საქართველოში შემოჭრა და ქვეყნის ნაწილის ოკუპაცია და ასევე, ფოტოს გადაღების ადგილი - პროევროპული აქციები, რომელზეც პოლიციამ ჟურალისტებსა და მოქალაქეებს ფიზიკურად გაუსწორდა:

„ამ კონტექსტში ბევრი ქართველი ფოტოგრაფი გაბრაზებულია, რადგან ამ პროტესტის გაშუქებაში დააჯილდოვეს რუსი ფოტოგრაფი, რომელიც მუშაობს რუსეთის სახელმწიფო კონტროლირებად საინფორმაციო სააგენტოში, რომელსაც დამსახურებულად აკრიტიკებენ დამოუკიდებლობის ნაკლოვანებების გამო“.

რამდენიმე დღის წინ ცნობილი გახდა, რომ World Press Photo-ს 2025 წლის გამარჯვებული ევროპიდან ფოტოისტორიების კატეგორიაში რუსი ფოტოგრაფი გახდა. კრემლის საინფორმაციო სააგენტო TASS-ის თანამშრომელმა მიხაილ ტერეშჩენკომ კონკურსში თბილისის საპროტესტო აქციებზე გადაღებული ფოტოისტორია წარადგინა.

ფოტოგრაფები, რომლებიც იღებდნენ 2024 წლის გაზაფხულის და ნოემბერ-დეკემბრის აქციებს, მიიჩნევენ რომ რუსი ფოტოგრაფის ნამუშევრებიც სუსტია და ჟიურისაც არ აღმოაჩნდა საკმარისი მგრძნობელობა კონტექსტის გასათვალისწინებლად. სწორედ ამიტომ მათ ერთობლივი განცხადებით მიმართეს World Press Photo-ს.

ისინი აღნიშნავდნენ, რომ „World Press Photo-ს მიერ შერჩეულმა ფოტოგრაფმა საჯაროდ დაუჭირა მხარი რუსეთის შეჭრას უკრაინაში და ეს აგრესია „განმათავისუფლებელ“ აქტად შეაფასა“.

World press photo პრესტიჟული საერთაშორისო კონკურსია. ორგანიზაცია განმარტავს, რომ ჟიური ნამუშევრებს ანონიმურად აფასებს - არ იციან ავტორი და მედია, რომელსაც ისინი წარმოადგენენ.