“აუცილებლად დაიწყება გამოძიება” – პროკურორი ბაჩიაშვილის მიერ ქვეყნის დატოვებაზე

გიორგი ბაჩიაშვილის საქმეების პროკურორი, მიხეილ სადრაძე ამბობს, რომ ბრალდებულის ქვეყნიდან გასვლის საქმეზე აუცილებლად დაიწყება გამოძიება.

ეს განცხადება სადრაძემ თბილისის საქალაქო სასამართლოში, სხდომის დაწყებამდე რამდენიმე წუთით ადრე გააკეთა. იმ სხდომის, რომელსაც თავად ბრალდებულ – გიორგი ბაჩიაშვილიც უნდა დასწრებოდა. თუმცა რამდენიმე საათით ადრე მან სოციალურ ქსელში დაწერა, რომ ქვეყანა დატოვა. 

“როგორც მოგეხსენებათ, მის მიმართ გამოყენებული არის აღკვეთოს ღონისძიებების სახით გირაო. ასევე, დამატებითი ღონისძებები, რაც გულისხმობს საზღვრის კვეთის აკრძალვას ბრალდების მხარის წინასწარი ინფორმაციისა და თანხმობის გარეშე, ასევე, პასპორტები ჰქონდა ჩამორთმეული. ბუნებრივია, ფაქტობრივი მოცემულობა რაც გვაქვს, გვაქვს. საჭიროებს შესწავლას, რაც გულისხმობს იმას, რომ ამ მიმართულებით აუცილებლაად დაიწყება გამოძიება”, – ამბობს სადრაძე.

გიორგი ბაჩიაშვილის სასამართლო სხდომა დღეს, 4 დეკემბერს, 09:30-ზე იყო დანიშნული. თუმცა დაწყებამდე ცოტა ხნით ადრე ინფორმაცია გავრცელდა, რომ სხდომა 14:00 საათამდე გადაიდო. მალევე თავად ბაჩიაშვილმა სოციალურ ქსელში დაწერა, რომ მიიღო ინფორმაცია “უსაფრთხოებაზე რეალური საფრთხეების შესახებ” და იძლებული გახდა, ქვეყნიდან წასულიყო.

ამჟამად პროკურატურა ბაჩიაშვილის წინააღმდეგ ორ სისხლის სამართლის საქმეს აწარმოებს. ორივეში მომჩივანი ბიძინა ივანიშვილია. ბაჩიაშვილს ბიტკოინების საქმეზე 2.5 მილიონლარიანი გირაო ჰქონდა შეფარდებული, ხოლო მტკვარი ჰესის ბრალზე – 50 000 ლარი.

მას ქვეყნის დატოვებაც ეკრძალებოდა. ჯერ უცნობია, რა გზით მოახერხა საქართველოდან გასვლა. პროკურატურა მასზე, სავარაუდოდ, საერთაშორისო ძებნის გამოცხადებას ეცდება.

რას ედავებიან ბიძინა ივანიშვილის თანაინვესტირების ფონდის ყოფილ ხელმძღვანელს – მოკლედ

ბიტკოინების საქმეში პროკურატურა და ბიძინა ივანიშვილი ბაჩიაშვილს ედავებიან, რომ მან დიდი ოდენობით, კერძოდ, თითქმის 40 მლნ დოლარის ღირებულების ბიტკოინები  მიითვისა. ბრალის მიხედვით, ბაჩიაშვილმა ბიტკოინები ბიძინა ივანიშვილის მიერ ჩადებული ინვესტიციებით შეიძინა, თუმცა მას მოგება არ მისცა. ბაჩიაშვილი კი ამბობს, რომ ივანიშვილმა თავისი ბანკიდან მას უბრალოდ ფული ასესხა, რომელიც უკან დააბრუნა და ის, რომ ეს სესხი იყო და არა ინვესტიცია, დადასტურებულია აუდიო ჩანაწერებით, რომელიც მისი და ივანიშვილის სატელეფონო საუბრებს ასახავს.

მტკვარი ჰესის საქმეში ბაჩიაშვილს ივანიშვილი და პროკურატურა ედავებიან, რომ მან არ გაითვალისწინა ჰესის საკითხზე ჩატარებული კვლევები და არაჯეროვნად შეასრულა თანაინვესტირების ფონდის ხელმძღვანელის მოვალეობა, რის შედეგადაც მტკვარი ჰესი, რომელშიც მილიონობით დოლარი დაიხარჯა, დღემდე არ არის აშენებული. გიორგი ბაჩიაშვილის და მისი ადვოკატის თანახმად, ბაჩიაშვილისთვის წაყენებულ მეორე ბრალზე ხანდაზმულობის ვადა გასულია. როგორც ბაჩიაშვილის ადვოკატმა ლევან მახარაშვილმა განაცხადა, სადავო ხელშეკრულება 2014 წელს გაფორმდა და წარდგენილ ბრალზე ხანდაზმულობის ვადა 2020 წელს გავიდა.