„ახალი თეატრის“ დასი დოიაშვილის გადაყენებაზე: არ ვაღიარებთ არალეგიტიმური კულტურის სამინისტროს გადაწყვეტილებას

„დღეს არალეგიტიმურმა კულტურის სამინისტრომ ახალი თეატრის სამხატვრო ხელმძღვანელის თანამდებობიდან გაათავისუფლა დავით დოიაშვილი, რადგან მან გაბედა და ხმა აიმაღლა უსამართლობის წინააღმდეგ, რის წინაშეც საქართველოს ნებისმიერი მოქალაქე ვდგავართ. დავით დოიაშვილზე თავდასხმა არის თავდასხმა თითოეულ ჩვენგანზე. ეს არის დასჯა სოლიდარობისთვის, თანადგომისთვის და თავდასხმა თითოეულ ხელოვანზე, რომელიც ემსახურება ხალხს და სახელმწიფოს.

ჩვენ, ვასო აბაშიძის სახელობის ახალი თეატრის დასი, რომლის წევრიც ამჟამად უსამართლო ტყვეობაშია, წინსვლას და განვითარებას დავით დოიაშვილის ხელმძღვანელობის გარეშე ვერ ვხედავთ. არ ვაღიარებთ არალეგიტიმური კულტურის სამინისტროს გადაწყვეტილებას და ჩვენ, ამ თეატრის დასი, დავით დოიაშვილს არ ვუშვებთ. ვდგავართ მასთან ერთად და ვიდგებით გამარჯვებამდე“, - წერია დასის განცხადებაში.

დღეს, 16 აპრილს, მედიასაშუალებებმა გაავრცელეს კულტურის სამინისტროს განცხადება, რომლითაც ცნობილი გახდა, რომ დავით დოიაშვილს თანამდებობა დაატოვებინეს.

„სახელმწიფო ბიუჯეტიდან მიღებული უწყვეტი დაფინანსების პირობებში, თეატრში შემოქმედებითი პროცესი თვეების მანძილზე შეჩერებული იყო“, - წერია სამინისტროს განცხადებაში.

დავით დოიაშვილის მხარდასაჭერად თეატრთან მსახიობები და მოქალაქეები შეიკრიბნენ. მან მოგვიანები სიტყვით მიმართა მათ.

„ეს თეატრი იყო იმის მაგალითი, თუ როგორ შეიძლება დაუჭირო მხარი ერთ ადამიანს და გამოუცხადო სოლიდარობა... ამ ყველაფერს ველოდი: ველოდი უფრო ადრე, ვიდრე ეს მოხდა. ვიქნები თუ არა ამ თეატრის ხელმძღვანელი, მეორეხარისხოვანია... მე წავალ თუ მოვალ, არ არის მთავარი; მთავარია, გამოუშვათ პოლიტპატიმრები“, - თქვა დავით დოიაშვილმა.

ვასო აბაშიძის სახელობის ახალი თეატრი საპროტესტო ტალღაშია ჩართული თეატრის მსახიობის, ანდრო ჭიჭინაძის დაკავების გამო - მსახიობი პროევროპული აქციების ერთ-ერთი მონაწილეა, მას პროკურატურა ჯგუფურ ძალადობაში მონაწილეობას ედავება და მრავალწლიანი პატიმრობა ემუქრება.

პროევროპული აქციების პირველივე დღეებში პოლიციამ მსახიობი ანდრო ჭიჭინაძე საკუთარ ბინაში დააკავა. თეატრმა „ქართული ოცნების“ ხელისუფლებას მის გასათავისუფლებლად ვადა 21 იანვრამდე მისცა, თუმცა მოთხოვნა არ დაკმაყოფილდა. 23 იანვარს რეჟისორმა დავით დოიაშვილმა საპროტესტო მანიფესტზე განაცხადა, რომ „ახალი თეატრი“ გავიდოდა რეგიონებში და ყველასთან მივიდოდნენ. მანიფესტი წარდგა თბილისის, ბათუმისა და ქუთაისის წინაშე.