ბათუმმა ტყიბულში ორბი დაამარცხა, ქუთაისმა კი ზესტაფონში თსუ-ს მოუგო

სუპერლიგის პირველი წრე სრულდება. მე-11 ტურის 2 მატჩი დღეს რეგიონებში გაიმართა. ტყიბულში “ორბმა” “ბათუმს” უმასპინძლა, ხოლო მოქმედი ჩემპიონი “ქუთაისი 2010” მიმდინარე სეზონის ერთპიროვნულ ლიდერ თსუ-ს ზესტაფონში შეხვდა. მიზეზი ქუთაისის სპორტის სასახლის ტექნიკური გაუმართაობა გახლდათ.

მივყვეთ თანმიმდევრობით. ტყიბულში გამართულ შეხვედრაში სტუმრებმა გაიმარჯვეს. ბათუმელებმა მეტი მობილიზებით ჩაატარეს წლის ბოლო შეხვედრა და 85:71 (სტატისტიკა) გაიმარჯვეს. იმერული კლუბისთვის ეს განგაშის ზარი უნდა იყოს, რადგან”ორბს” მხოლოდ 2 მოგება შერჩა და ეს ყველაზე ცუდი შედეგია სუპერლიგაში. ტყიბულის გუნდი ახალ წელს ბოლო ადგილზე ხვდება და მეორე წრეში დიდი ძალისხმევა მართებს, გასავარდნ ზონას რომ თავი დააღწიოს.

ორბის ხელმძღვანელობამ არასახარბიელო შედეგების გამო შემადგენლობაში ლეგიონერების ხარჯზე ცვლილებები მოახდინა, თუმცა ახალწვეულები ჯერჯერობით ვერ ამართლებენ. არა უშავს ტაისონ ჯექსონს, თუმცა ტიმოთი ქემერონმა ჯერ სახეირო ვერაფერი შესთავაზა მეტოქეებს. ორბმა მხოლოდ პირველი პერიოდის მოგება (21:19) მოახერხა, რის შემდეგაც ბათუმელებმა მატჩზე კონტროლი დაამყარეს და ყველა დარჩენილი პერიოდი მოიგეს. ბათუმელებმა მეტოქეზე 7 სამქულიანით მეტო ჩააგდეს და ძირითადად ამის ხარჯზე იმარჯვეს.

გამარჯვებულებს 19 ქულითა და 10 მოხსნით ჯექსონ ბრენჩლიმ ულიდერა. 15 ქულა და 8 მოხსნა დავით ომიძემ, 14 ქულა და 11 მოხსნა ლუკა კალატოზიშვილმა მიითვალა. ორბში საუკეთესო შედეგი ბექა ლომაშვილს ჰქონდა – 8 ქულა, 8 მოხსნა და 5 პასი. ბომბარდირი კი დონდრე რედიკი გახლდათ 22 ქულით.

ზესტაფონში გამართული მატჩი საკმაოდ დაძაბული გამოდგა. ქუთაისს წაგების უფლება არ ჰქონდა, რადგან მოქმედი ჩემპიონის სტატუსს ფლობს, ახლაც საჩემპიონო ამბიცია აქვს და წინა 2 მატჩი წაგებული ჰქონდა. თავის მხრივ, თსუ-საც მარცხი ჰქონდა განცდილი, თუმცა წინა ტურში წაგებული მატჩი ერთადერთი გახლდათ მიმდინარე სუპერლიგაში.

თსუ-ს ამ მატჩში გიორგი ცინცაძე დაუბრუნდა, რომელმაც ტრავმის გამო გასული შეხვედრები გამოტოვა. ცინცაძე უნივერსიტეტელთაგან საუკეთესო იყო, თუმცა ამან არ იკმარა. ქუთაისმა უფრო გუნდურად, შეთამაშებულად და რაც მთავარია, გუნდურად ითამაშა და პირველი ნახევრის შემდეგ 11 ქულით დაწინაურდა.

თსუ არ ნებდებოდა და ბოლომდე იბრძოდა. ლექსო ლაფანაშვილის გაწვრთნილმა უნივერსიტეტელებმა იბრძოლეს და ბოლო წუთებამდე შანსს ინარჩუნებდნენ, მაგრამ ქუთაისელებმა შეცდომა არ დაუშვეს. მეტოქის ყველა მცდელობა, ჩამორჩენა გაებათილებინათ, საპასუხო შეტევებით ჩაახშვეს. თსუ-მ მხოლოდ ის მოახერხა, რომ რამდენიმე მომენტში ჩამორჩენა 5 ქულამდე შეამცირა. ერთხელ სხვაობა 3 ქულამდეც დავიდა.

საბოლოოდ “ქუთაისმა” 109:103 (სტატისტიკა) იმარჯვა და მე-2 ადგილზე გადავიდა. იმერულ კლუბს გიორგი კორსანტიამ ულიდერა, რომელმაც 37 წუთი 34 ქულა, 14 მოხსნა, 5 პასი და 2 ჩჭრა მიითვალა. 17 ქულა, 10 პასი და 7 მოხსნა ელაია ჯოინერმა მიითვალა. 16 ქულა მარქილ სმიტის ანგარიშზე დაგროვდა. თსუ-ში გიორგი ცინცაძეს 23 ქულა, 6 მოხსნა და 5 პასი ჰქონდა. 15 ქულა გლენ აბრამის ანგარიშზეა.

ასე და ამგვარად მე-11 ტურში დარჩენილია 2 მატჩი. გორისა და რაშის მატჩი გადაიდო, ხოლო “მარგვეთისა” და ვსა-ს შეხვედრა 29 დეკემბერს, ზესტაფონში ჩატარდება. ამ მატჩის გამარჯვებული სუპერლიგის ცხრილში მე-2 ადგილზე გამაგრდება.

gbf.ge