23 hours ago
3
ევროკავშირის უმაღლესი წარმომადგენელი საგარეო ურთიერთობებისა და უსაფრთხოების პოლიტიკის საკითხებში, ვიცე-პრეზიდენტი კაია კალასი და ევროკომისარი გაფართოების საკითხებში მარტა კოსი ერთობლივი განცხადებას ავრცელებენ "ქართული ოცნების" პარლამენტის მიერ მიღებულ საკანონმდებლო ცვლილებებთან დაკავშირებით, კერძოდ საზოგადოებრივი კონსულტაციების გარეშე მიღებულ „უცხოელი აგენტების რეგისტრაციის აქტსა“ (FARA) და „მაუწყებლობის შესახებ კანონზე“.
განცხადებაში კალასი და კოსი მიუთითებენ, რომ კანონები "დამატებით ინსტრუმენტებს აძლევს საქართველოს ხელისუფლებას განსხვავებული აზრის ჩასახშობად და რეპრესიული პოლიტიკის გასამკაცრებლად", რაც საფრთხეს უქმნის სამოქალაქო აქტივისტების საქმიანობას, ძირს უთხრის სამოქალაქო საზოგადოების და დამოუკიდებელი მედიის არსებობას, უკან ხევს ადამიანის უფლებების დაცვას, არაპროპორციულად ზღუდავს ფუნდამენტურ თავისუფლებებს და ასუსტებს დემოკრატიული გადაწყვეტილებების მიღების პროცესს.
"ეს ნაბიჯები კიდევ უფრო არყევს დემოკრატიის საფუძვლებს საქართველოში. მსგავსი ქმედებები შეუთავსებელია ევროკავშირის დემოკრატიის, სამართლის უზენაესობისა და მედიის პლურალიზმის ღირებულებებთან და შორს არის იმ სტანდარტებისგან, რასაც კანდიდატი ქვეყნისგან მოველით",- წერია განცხადებაში, რომლის მიხედვითაც ეს ნაბიჯები უარყოფითად აისახება საქართველოს ევროკავშირში გაწევრიანების გზაზე.
ისინი მოუწოდებენ "ქართული ოცნების" ხელისუფლებას "გამოიჩინოს ნამდვილი და შეუქცევადი ერთგულება ევროპული გზისადმი დაბრუნების მიმართ. ამისათვის აუცილებელია შეწყდეს ძალადობა მოქალაქეების წინააღმდეგ, გათავისუფლდეს უსაფუძვლოდ დაკავებული ყველა პირი, შეჩერდეს რეპრესიული კანონები, გაიმართოს კონსულტაციები ვენეციის კომისიასთან და დაიწყოს არსებითი დიალოგი სამოქალაქო საზოგადოებასა და ყველა პოლიტიკურ აქტორთან, რათა მოიძებნოს გამოსავალი არსებული კრიზისიდან".
„ქართულის ოცნების“ პარლამენტმა 1 აპრილს მესამე მოსმენით მიიღო მედიისა და სამოქალაქო ორგანიზაციების შემზღუდავი და სხვა რამდენიმე კანონი. ზოგიერთი მათგანი მიხეილ ყაველაშვილის ხელმოწერისთანავე ამოქმედდება, ზოგიერთი კი - 60 დღის შემდეგ.
English (US) · 
Georgian (GE) ·