“გონიოს“ პრეზიდენტი დიდთოვლობის შედეგად დაზარალებულ ადამიანებს დაეხმარება

ეროვნულ ლიგა 2-ში დაწინაურებული “გონიოს“ პრეზიდენტმა, დავით დოლიძემ სოციალურ ქსელში პოსტი გამოაქვეყნა და აჭარის რეგიონში დიდთოვლობის შედეგად დაზარალებულ ადამიანებს სასტუმროში დაბინავება შესთავაზა.

“ჩემო ბათუმელებო, ჩემო აჭარლებო, სულით და გულით თქვენს სამსახურში მიგულეთ. ჩვენს რეგიონში დიდთოვლობის შედეგად დაზარალებულ ოჯახებს გვინდა მივმართოთ. მზად ვართ, მიგიღოთ სასტუმრო “ეიფორიაში“, სადაც უზრუნველყოფილი იქნებით საცხოვრებელი ნომრებით და კვებით. საჭიროების შემთხვევაში დაგვიკავშირდით ჩვენს ფეისბუკ გვერდზე“, – წერს “გონიოს“ პრეზიდენტი.

დავით დოლიძემ ჩამოაყალიბა საფეხბურთო კლუბი “გონიო“, რომელმაც სამ წელიწადში შეუძლებელი შეძლო და მოყვარულთა (ანუ რანგით მე-5) ლიგიდან ეროვნულ ლიგა 2-ში თამაშის უფლება მოიპოვა. მაგრამ გუნდს პრობლემები ექმნება – გონიოს სტადიონის საფარი არ ვარგა, რის გამოც რამდენიმე დღეა ვარჯიში შეწყვეტილია.

დავით დოლიძე: “ჩვენი გუნდი კეთილმოწყობილ ფეხბურთის მოედანს იმსახურებს. „გონიო“ ლიგა 2-ში თამაშობს, მაგრამ სავარჯიშოდ და საშინაო თამაშების გასამართავად მოედანი არ აქვს, ვინაიდან არსებული სტადიონი არ აკმაყოფილებს ლიგა 2-ის სტანდარტებს“.