civil ახალი ამბები 
თბილისის საქალაქო სასამართლოს მოსამართლემ, ნინო ტარაშვილმა, საქართველოს სახელმწიფო უსაფრთხოების სამსახურის (სუსი) ყოფილ უფროსს გრიგოლ ლილუაშვილს 13 წლით თავისუფლების აღკვეთა მიუსაჯა მას შემდეგ, რაც იგი ქრთამის აღებასთან დაკავშირებულ ოთხ ეპიზოდში დამნაშავედ ცნო.
ლილუაშვილი, რომელიც სუსს 2019 წლიდან 2025 წლის აპრილში თანამდებობის დატოვებამდე ხელმძღვანელობდა, კორუფციულ სქემებში მონაწილეობის ბრალდებით 2025 წლის 23 დეკემბერს დააკავეს.
პირველი საქმე 2022 წლით თარიღდება, როდესაც ლილუაშვილმა, სავარაუდოდ, თურქი ინვესტორისგან, ჩაღათაი ულქერისგან, ეკონომიკის მინისტრის ყოფილი პირველი მოადგილის რომეო მიქაუტაძის მეშვეობით, 1 მილიონი აშშ დოლარის ოდენობის ქრთამი აიღო. პროკურატურის მტკიცებით, თანხა ქარის ელექტროსადგურების მშენებლობის შესახებ თანამშრომლობის მემორანდუმის გაფორმების ხელშესაწყობად გაწეული ლობირების სანაცვლოდ გადაიხადეს.
ქრთამის აღების კიდევ ერთი, 2022 წლის საქმე ეხება ბიზნესმენ გიორგი ხაჟალიასგან 1,5 მილიონი ლარის მოთხოვნასა და მიღებას; ლილუაშვილი, კვლავ მიქაუტაძის მეშვეობით, აღნიშნულ თანხას გაზიფიცირების ტენდერებთან დაკავშირებული დახმარების სანაცვლოდ იღებდა.
მესამე ეპიზოდი უკავშირდება 2021 და 2023 წლებში მოქმედი თაღლითური ქოლ-ცენტრების ქსელის ნაწილის მფარველობას. პროკურატურა ლილუაშვილს ქსელის ნაწილის ხელშეწყობასა და ქრთამის სახით დაახლოებით 1,365 მილიონი აშშ დოლარის მიღებაში სდებდა ბრალს მისი ნათესავის, სანდრო ლილუაშვილის მეშვეობით.
რაც შეეხება მეოთხე ეპიზოდს, გრიგოლ ლილუაშვილი თავისი თანამდებობრივი მდგომარეობის გამოყენებით, ქრთამის აღების სანაცვლოდ, მფარველობას უწევდა თბილისის მერიის საბავშვო ბაგა-ბაღების მართვის სააგენტოს ყოფილ დირექტორს კახაბერ გვანცელაძეს, რომელიც საბავშვო ბაღების მიერ განსახორციელებელი შესყიდვების ხელშეკრულებების გაფორმებისათვის მეწარმე სუბიექტებისგან, სააგენტოს თანამშრომლების მეშვეობით, ქრთამის სახით განსაკუთრებით დიდი ოდენობის თანხებს, ე.წ. ,,ატკატებს’’ იღებდა.
This post is also available in:
