პოლიციამ „ლელო - ძლიერი საქართველოს“ გენერალური მდივანი ირაკლი კუპრაძე, ოთარ ფარულავა და ჯუბა ლოლაძე დააკავა. ამის შესახებ ინფორმაცია რადიო თავისუფლებას პარტია "ლელოში" დაუდასტურეს. მათი თქმით, პოლიციამ ისინი ვარაზისხევზე გააჩერა, როდესაც მანქანით გადაადგილდებოდნენ და შემდეგ დააკავა.
დაკავებამდე, ოთო ფარულავამ ფეისბუქლაივი ჩართო. კადრებში ჩანს, რომ მათ მანქანასთან საპატრულო პოლიციის სამი ეკიპაჟი მივიდა. პატრულის წარმომადგენლებს ირაკლი კუპრაძემ უთხრა, რომ ისინი პოლიტიკურ პარტიას წარმოადგენენ, რაზეც ერთ-ერთმა პოლიციელმა მას ჰკითხა, ამის გამო, რაიმე პრივილეგიით სარგებლობდნენ თუ არა?
კუპრაძის კითხვაზე, რის საფუძველზე გააჩერეს ისინი, პოლიციელი, რომელიც პარალელურად ტელეფონით სხვასთან საუბრობდა, მას პასუხობს, რომ "კანონის საფუძველზე" გააჩერეს. ამის შემდეგ პოლიციელებმა "ლელოს" წევრებს მიმართეს, რომ მათ გაყვნენ და ტელეფონები გათიშონ.
პარტია "ლელოში" ამბობენ, რომ მათთვის, ამ ეტაპზე უცნობია, სად გადაიყვანეს ისინი.